"Biz iqlim dəyişikliyi sayəsində dayanıqlılığı təmin etməklə xüsusilə də metan qazının yayılmasının qarşısının alınması istiqamətində bütün imkanlardan istifadə etməyə çalışırıq".
Avtosfer.az xəbər verir ki, bunu COP29 Prezidentliyinin mətbuat konfransında COP29-un baş danışıqçısı, xarici işlər nazirinin müavini Yalçın Rəfiyev bildirib.
O deyib ki, bundan öncə keçirilən iqlim sammitlərində bu istiqamətdə müəyyən nəticələr əldə olunub.
Y.Rəfiyevin sözlərinə görə, hazırda Azərbaycan da daxil olmaqla, 160 ölkə bu zərərli qazın yayılmasının qarşısının alınması təşəbbüsünə qoşulub:
"Bu öhdəliyin icrası üçün biz metan tullantılarının yayılmasına rəvac verən bütün mənbələri diqqətlə nəzərdən keçirməliyik. Hazırda SOCAR da daxil olmaqla, 50 şirkət neft və qazın dekarbonizasiyası üzrə təşəhhüsə qoşulub. Onu da diqqətə çatdırım ki, 2022-ci ildə qida tullantıları atmosferə buraxılan istixana qazlarının 110 faiz təşkil edib. Bu günə olan məlumata görə 30-dan çox ölkə artıq metan qazı tullantılarının məhdudlaşdırılması haqqında bəyannaməyə qoşulduğunu elan edib. Onların arasında bu növ tullantıların atılması həcminə görə ilk 10 ölkə sırasında yer alan dövlətlər var. Bu sənəd cari ildə bu sahədə görülə biləcək daha geniş spektrli tədbirləri müəyyən edir".
