Masallıda güləş zalının açılışı
Masallıda növbəti güləş idman zalının açılışı olub.
Masallı Uşaq-Gənclər İdman-Şahmat Məktəbində (UGİŞM) istifadəyə verilən yeni güləş zalının açılış mərasimində Azərbaycan Güləş Federasiyasının baş katibi Nəsimi Musayev, baş katibin müavini Orxan Məmmədov, Lənkəran-Astara Regional Təhsil İdarəsinin Masallı rayon sektorunun müdiri Elman Rzayev, Lənkəran-Astara Regional Gənclər və İdman İdarəsinin idman sektorunun müdiri Yusif Xamıyev, Olimpiya, Avropa və dünya çempionları, sərbəst güləş üzrə Azərbaycan milli komandasının məşqçiləri Cəbrayıl Həsənov, Toğrul Əsgərov, Əşrəf Əliyev, idman ictimaiyyəti və KİV nümayəndələri iştirak ediblər.
Əvvəlcə idmanımızın böyük himayədarı Ulu öndər Heydər Əliyevin və Azərbaycanın müstəqilliyi, ərazi bütövlüyü uğrunda canlarını fəda edən şəhidlərimizin əziz xatirəsi bir dəqiqəlik sükutla yad olunub.
Əsası Ümummilli Lider tərəfindən qoyulan və bu gün ölkə rəhbəri, Milli Olimpiya Komitəsinin Prezidenti cənab İlham Əliyevin məqsədyönlü siyasəti nəticəsində Azərbaycanın dünyanın qabaqcıl idman ölkələrindən birinə, xüsusən də güləş ölkəsinə çevrildiyini vurğulayan Lənkəran-Astara Regional Təhsil İdarəsinin Masallı rayon sektorunun müdiri Elman Rzayev, Azərbaycan Güləş Federasiyasının baş katibi Nəsimi Musayev, Lənkəran-Astara Regional Gənclər və İdman İdarəsinin idman sektorunun müdiri Yusif Xamıyev, Olimpiya və Avropa çempionu, dünya mükafatçısı, qadın güləşçilərdən ibarət ölkə yığmasının böyük məşqçisi Toğrul Əsgərov, sərbəst güləş üzrə yığmanın böyük məşqçisi Cəbrayıl Həsənov, Azərbaycan İdman Jurnalistləri Assosiasiyasının üzvü, jurnalist-publisist Akif Ağayev idmanın kütləviliyinin artırılması istiqamətində paytaxtla yanaşı regionlarda da görülən işlərin gənc nəslin mənəvi və fiziki inkişafındakı rolundan danışıb, yeni idman zalının açılışının Masallı güləşinin inkişafına töhfə verəcəyini diqqətə çatdırıblar.
Çıxışçılar rayonun bütün idmançılarını, xüsusilə yeniyetmə və gənc güləşçiləri əlamətdar gün münasibətilə təbrik edib, onlara növbəti yarışlarda uğurlar arzulayıblar.
Respublikanın Əməkdar məşqçisi Qurbanəli İsayev, Masallı UGİŞM-nin sərbəst güləş bölməsinin məşqçi-müəllimi Cavad Həsənov güləş zalının açılışına göstərdiyi dəstəyə görə aidiyyatı təşkilatlara, iş adamlarına minnətdarlıq, bu cür zallarda gələcəyin güclü pəhləvanlarının yetişəcəyinə əminliklərini bildiriblər.
Çıxışlardan sonra yeniyetmə güləşçilərin dairəvi xalça üzərində nümunəvi çıxışları izlənilib.
Sonra Masallı şəhərində və Ərkivan qəsəbəsindəki güləş zallarına baxış keçirilib, xatirə şəkilləri çəkilib.
Akif VAQİFOĞLU
