“Əl-Nəsr”in portuqal ulduz hücumçusu Kristiano Ronaldo daha əvvəl “İnterneti sındıracağıq” deyə vəd verdiyi qonağının adını açıqlayıb.
Arena.az məlumat verir ki, Kristiano Ronaldo özünün şəxsi “YouTube” kanalına dəvət edəcəyi qonağının məşhur bloqçu MrBeast olduğunu bildirib.
MrBeast (əsl adı Ceyms Stiven Donaldson – redaktorun qeydi) 330 milyon izləyici auditoriyası ilə dünyanın ən məşhur “YouTube” bloqçularından biridir. Kristiano Ronaldonun yeni yaradılmış şəxsi kanalının isə 65 milyon abunəçisi var.
MrBeast-in iştirak edəcəyi silsilə bu gün, noyabrın 21-də Kristiano Ronaldonun şəxsi “YouTube” kanalında təqdim ediləcək.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 15 oyuna 10 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 79 oyun, 68 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
