Medianın İnkişafı Agentliyinin layihəsi: Uşaq və gənclərin fiziki və mənəvi inkişafı
Azərbaycan millisinin UEFA Millətlər Liqasında uğursuz çıxışla yadda qalaraq D Liqasına düşməsi şübhəsiz, futbol camiəsi üçün üzücü reallıqdır. Son turda səfərdə İsveç millisinə 0:6 hesabı ilə uduzaraq yerli futbolsevərləri ümidsizliyə qapdıran komandanın növbəti beynəlxalq matçlarda nə ilə yadda qalacağını zaman göstərəcək. Reallıq budur ki, seçmənin daha yaza qədər hər hansı imtahanı olmayacaq. Artıq bütün diqqətlər Avropa Liqasının Liqa mərhələsində mübarizə aparan "Qarabağ"dadır. Nəinki əsas millinin, U-19 və U-17-nin timsalında digər yaş qrupları üzrə yığmaların da nəticlərinə üzülən yerli futbolsevərlər Ağdam təmsilçisinin uğurlu matçlarına baxmaq, belə desək, "köhlən atlar"ın qələbələri ilə təsəlli tapmaq istəyir.
Səfər qələbəsi çox şeyi dəyişdi
Avropa Liqasının Liqa mərhələsinin ilk 3 turunda məğlub olan "Qarabağ"ın 4-cü turda son illərdə adından söz etdirən "Budyo Qlimt"i Norveçdə yenməsi (2:1) həm hədəf, həm də özünəinam baxımından olduqca önəmli məqam sayılır. Təmsilçimiz öz meydanında adlı-sanlı klubları şoka salmağı bacaran Skandinaviya komandasını qonaq qismində üstələyərək ictimaiyyətə "mən hələ buradayam, mübarizəyə davam" mesajı verdi.
"Köhlən atlar"ın bu mövsüm ilk dəfə yeni formatda keçirilən turnirdəki 1/8 final və ya pley-off perspektivini indidən incələmək bir qədər tələskənlik olar. Amma gerçəklik belədir ki, "Qarabağ" qarşıdakı ev oyununda da qələbə qazanmağı bacarsa, yekunda 24 ən yaxşı kollektiv arasına düşmək şansını ciddi şəkildə artıracaq.
"Olimpik Lion" gəlir
Qurban Qurbanovun rəhbərlik etdiyi kollektiv noyabrın 28-də "Olimpik Lion"u qəbul edəcək. Fransanın ən tanınmış təmsilçilərindən biri ilə görüşün start fiti 21:45-də səsləndiriləcək. Şübhəsiz, "Qarabağ"ı böyük futbol ənənələrinə malik Lion komandası ilə matçın favoriti adlandıra bilmərik. Təmsilçimizin yalnız azarkeşlərin möhtəşəm dəstəyi fonunda ən yaxşı oyunlarından birini sərgiləyəcəyi və realizasiya planında "axsamayacağı" halda istəyinə çatması mümkündür. Təbii, ağdamlılar potensialını tam şəkildə ortaya qoyduğu qarşılaşmalarda büdcə baxımından özündən dəfələrlə üstün rəqibləri də məyus etməyi bacarır.
Son 5 matçda 1 qələbə
"Olimpik Lion" hazırda Liqa 1-in turnir cədvəlində 18 xalla (5 qələbə, 3 heç-heçə, 3 məğlubiyyət) 5-ci pillədə mövqe tutub. "Uşaqlar"ın bütün turnirlər daxil olmaqla, son 5 matçda 1 qələbə qazanması "Qarabağ" adına ümidverici faktdır. Avropa Liqasının Liqa mərhələsinin 3-cü turunda evdə "Beşiktaş"a 0:1 hesabı ilə uduzandan sonra səfərdə Almaniya "Hoffenhaym"ı ilə 2:2 hesablı bərabərliyə razılaşan OL Fransa çempionatında da 2 bərabərliyə imza atıb. "Qarabağ"ın rəqibi Liqa 1-in son turunda autsayderlər qrupunda qərarlaşan "Sent-Etyen"i minimal hesabla üstələyib.
Sözügedən kollektivin cari mövsüm Avropa Liqasındakı bütün matçlarının nəticələri isə belədir:
Olimpik Lion - Olimpiakos 2:0
Reyncers - Olimpik Lion 1:4
Olimpik Lion - Beşiktaş 0:1
Hoffenhaym - Olimpik Lion 2:2
Gördüyünüz kimi, AL-ə də fırtına kimi başlayan Fransa komandası sonrakı iki qarşılaşmada qələbə görməyib. Mövcud vəziyyətə nəzərən bu kollektivin hazırda formasının zirvəsində olmadığını iddia etmək çətin deyil.
Maliyyə böhranı da psixoloji təzyiqdir
Son günlərdə Fransa mətbuatında "Olimpik Lion"un maliyyə böhranı yaşadığı barədə informasiyalar yayılmaqdadır. "L’Équipe" nəşrinin yaydığı son məlumata görə, sabah klubun sahibləri Fransanın peşəkar futbol klublarının hesablarının monitorinqi və nəzarətindən məsul olan təşkilata (DNCG) hesabat təqdim edəcəklər. Yazılanlara inansaq, “Olimpik Lion” xəzinəni doldurmaq üçün müxtəlif yollara baş vurur. 75 milyon avro dəyərində qiymətləndirilən səhmlərin bir hissəsinin İngiltərənin “Kristal Pelas” klubunun sahibinə satılması, eləcədə bir sıra futbolçuların transfer bazarına çıxarılması mümkün variantlardan ən realı kimi dəyərləndirilir.
Bu vəziyyətin futbolçulara da təsir etdiyi bəlli həqiqətdir. Mətbuatın maliyyə böhranı barədə yaydığı məlumatlarla "uşaqlar"ın son vaxtlar ortaya qoyduğu nəticələr düz mütənasibdir. Deməli, "Lion" Bakıya həm də psixoloji problemlərlə gələcək və "Qarabağ" bu amildən də faydalanmaq şansına sahibdir.
"Qarabağ" nə dərəcədə hazırdır?
Noyabrın 19-dan satışa çıxarılan biletlərin qısa müddətdə yarısından çoxunun satılması isə oyun günü Tofiq Bəhramov adına Respublika stadionunda anşlaq olacağından xəbər verir. Yuxarıda qeyd etdiyimiz kimi, azarkeş amili çox vacib məsələdir.
"Budyo Qlimt"lə səfər oyununda cəzalı olduqları üçün meydana çıxa bilməyən iki əsas heyət üzvünün - Julio Romao və Elvin Cəfərquliyevin cəzasını başa vurması da qabardılmalıdır. Heyət nə qədər geniş olsa, Qurban Qurbanovun oyuna müdaxilə imkanları da bir o qədər artar. Digər tərəfdən, zədədən dönən yaradıcı dayaq yarımmüdafiəçisi Marko Yankoviçin forma yığması, eyni zamanda digər monteneqrolu legionerin - sağ cinah müdafiəçisi Marko Veşoviçin sıraya dönməsi yeni ümid işığı anlamındadır. Ağdam təmsilçisinə gec qoşulan ukraynalı vinger Aleksey Kaşukun uyğunlaşma problemini geridə qoyduğunu və son qarşılaşmalarda hücum xəttinə rəngarənglik gətirdiyini də unutmayaq. Azərbaycan çempionunun heyətlə bağlı ciddi problemi yoxdursa, bu görüşdə yerli futbolsevərləri qürurulandırmaq ehtimalı yetərincə realdır. İllərdir 4-3-3 sxemini dəyişməyən Qurbanovun bu görüşdə də ənənəyə sadiq qalacağı şübhə doğurmursa, taktiki planda dərin təhlillər aparmaq yersiz alınar. Qurban bəyin rəqibin zəif və güclü cəhətlərini özü üçün müəyyənləşdirdiyi, qarşı tərəfi mümkün qədər dərindən incələdiyi bəlli həqiqətdir. Görünən budur ki, "Qarabağ" bu tur "Səbail"ə qarşı süni qazon üzərində keçirəcəyi oyunda zədələrdən qaçmalı, Misli Premyer Liqasının matçında nəticəni belə desək, az qan bahasına əldə etməyə çalışmalıdır. "Olimpik Lion"la görüşdə isə yaxşı fikiziki və psixoloji hazırlıqla yanaşı, müəyyən idman xoşbəxtliyinə də ehtiyac olacaq. Ən yaxşısına ümid edək.
Nihat Ağasoy
Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub.
