Şəki Ağır Cinayətlər Məhkəməsində adam oğurluğuna cəhddə təqsirləndirilən Ramil İmanlının (şərti) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Tural Əfəndizadənin sədrliyi ilə keçirilən prosesdə hökm oxunub.
Məhkəmənin hökmü o, 8 il müddətinə azadlıqdan məhrum edilib.
İttihama görə, hadisə 14 oktyabr 2023-cü il tarixdə, saat 12:30 radələrində Ağdaş rayonunda yerləşən kəndlərin birində qeydə alınıb.
Belə ki, Ramil İmanlı qohumu, zərərçəkmiş İnarə Səmədovanın (şərti) yaşadığı ünvanın həyətinə gəlib, qadına fiziki güc tətbiq edib. O, zərərçəkmişin boynundan yapışdıqdan sonra bıçağı onun boğazına dirəyib küçəyə çıxarıb. Ramil qızı yolun kənarında saxladığı özünə məxsus “VAZ-21099” markalı avtomobilə doğru sürüyüb. Bu zaman İnarə qışqırıb səs-küy salıb kömək çağırmaqla israrlı müqavimət göstərib. Zərərçəkmişin səsinə gələn şəxslər onu Ramilin əlindən alıb.
Hadisədən sonra Ramil İmanlı saxlanılaraq cinayət məsuliyyətinə cəlb edilib və barəsində həbs qətimkan tədbiri seçilib.
Kamal Məmmədov
