Sahibkarlar və satış sahəsində çalışanlar həmişə yeni ilham qaynağı axtarırlar.
İlham qaynağı problemləri fərqli yollarla həll etməyimizə və gündəlik işlərimizə daha böyük həvəslə yanaşmağımıza kömək edir.
Moderator.az valyuta.az-a istinadən bu yazıda, Nyu-York küçələrində 5 dollara kartofsoyan sataraq milyonçu olmuş sahibkar Co Adesin (Joe Ades) həyat hekayəsini təqdim edir:
2009-cu ildə dünyasını dəyişmiş Ades, satış sahəsində çalışan və ya öz işini idarə edənlər üçün bu gün də ilham mənbəyidir.
İkinci Dünya müharibəsi dövründə İngiltərədə böyüyən Co Ades 80 yaşında olmasına baxmayaraq hər səhər obaşdan oyanır, kostyum və qalstukunu geyinir və həftənin altı günü yüksək keyfiyyətli kartofsoyan satırdı.
Ades satış sənətində əsl ustad idi. O, adi bir məhsul olan kartof qabığı soyucusunu fərqli və maraqlı satış şousuna çevirən unikal bir metod tapmışdı. Tam 60 il boyunca bu məhsulu sataraq özünə rahat və zəngin bir həyat qurmuşdu. O, elit mənzildə yaşayır, nəvələrini nüfuzlu universitetlərdə oxutmağı bacarırdı.
Tətilə çıxıb-çıxmadığı soruşulduqda isə həmişə belə cavab verirdi: “Həyat özü bir tətildir. Hər gün tətil.”
Co Adesdən öyrənilə biləcək həyat dərsləri isə mütləq ki var:
İşindən zövq al:
Çoxları küçədə kartof qabığı soyan satmağı maraqsız bir iş kimi düşünə bilər. Amma Co Ades bu işi canlı və maraqlı bir şouya çevirmişdi. İnsanlarla ünsiyyət qurmaq, onların marağını və etibarını qazanmaq onun üçün işdən zövq almağın əsas mənbəyi idi.
İşinə sadiq qal:
Co Ades işinə heç vaxt laqeyd yanaşmadı. Həftənin altı günü küçələrdə çalışırdı. Nyu-York küçələrindəki hər bir insan onun üçün potensial müştəri idi. O, fürsətləri görür və reallaşdırmaq üçün yorulmadan səy göstərirdi.
Həmişə yaxşı əlaqələr qur:
Adesin küçədə satış edərkən çəkilmiş videoları satış sənətinin ən gözəl nümunələrindəndir. Bu videolarda onun sadəcə satış etmədiyi, eyni zamanda insanlarla ünsiyyət qurduğu aydın görünür. O, insanları kartof qabığı soyucu almağa razı salmaq üçün pullarını ödəməyə deyil, əvvəlcə maraqlanmağa vadar edirdi.
Hər satışın dəyərini bil:
Ades yüksək həcmdə, lakin aşağı qiymətə satış üzərində qurulmuş bir biznes modeli ilə çalışırdı. Məhsulunu 5 dollara satması onun üçün həm səmərəli, həm də məntiqli idi. Bundan öyrəniləcək dərs isə hər bir müştəriyə və satışa dəyər verməkdir. Bəzən sahibkarlar yalnız böyük müştərilərə fokuslanaraq kiçik fürsətləri əldən verirlər. Co Ades isə göstərirdi ki, sadəcə kiçik müştərilərə xidmət etməklə də böyük uğur əldə etmək mümkündür. Co Ades həm uğurlu bir sahibkar, həm də Nyu-Yorkun küçələrinə rəng qatan bir sima idi. Onun texnikaları sadə görünə bilər, lakin əslində satış sənətində əbədi dəyərə malikdir.
