FİFA-nın keçmiş prezidenti Yozef Blatter futbolda yeni tendensiyaları və yeni texnologiyalardan istifadəni tənqid edib.
O, futbolun doğru istiqamətdə getmədiyini deyib: “İndi futbol yanlış istiqamətdə gedir. Biletlər bahalaşır. Futbolçulara daha çox təzyiq göstərirlər. Mədəni birlik əvəzinə meydanda daha çox düşmənçilik aparırlar. Mən həm də ofsaydların, qolların və cərimələrin müəyyən edilməsində yeni texnologiyaların əleyhinəyəm. İndi qərar verən hakim deyil, televiziyadır. Hakimlərə hörmət bütün dövrlərdə futbolun əsas xarakterik xüsusiyyətlərindən biri olub”.
Qeyd edək ki, isveçrəli Blatter 1998-ci ilin iyunundan 2015-ci ilin oktyabrınadək FİFA-ya rəhbərlik edib. O, 2015-ci ilin dekabrında rəsmi korrupsiya qalmaqallarına görə FİFA Etika Komitəsi tərəfindən 8 il müddətinə futbol fəaliyyətindən uzaqlaşdırılıb.
