Biz dəblərin dəyərləri sıradan çıxardığı bir dövrdə yaşayırıq.
Dəb nədi, dəyər nədi? Dəb təcrübə olunandır, dəyər təcrübə olunmuş. Dəb dəyişkəndir, dəyər sabitdir. Dəb xaosdur, dəyər nizamdır. İnsanlıq dəbsiz keçinə bilər, amma dəyərsiz məhv olar.
Dəb indiki xoşbəxtlikdir, dəyər sonrakı peşmanlıq!
Bizim insanların mənəviyyatını korlayan dəblə dəyərin fərqini bilməmələri, özlərini dəblərin əzilmişi kimi hiss etməmək üçün öz dəyərlərindən könüllü imtina etmələridir.
Sodom və Komorada hamı dəblə yaşayırdı, dəyərlə yaşayan bircə nəfər qalmışdı. Tanrı bu iki şəhəri o vaxt yer üzündən sildi ki, o bircə nəfər də dəbə yenildi.
Bu dini pritçanı bu cür anlamaq lazımdır.
Güclü insan dəbi dəyərinə uyğunlaşdırandır. Dəyərini dəbə uyğunlaşdırmaq zəiflik, acizlik əlamətdir.
Cəmiyyətimiz özünü dəblə dəyərləndirən insanlarla doludur. Bu, bizim dünyagörüşümüzün darlığıyla bağlıdır. Unutmayaq ki, sovet imperiyasını Qərbin cins şalvarları dağıtdı. Niyə? Çünki imperiyanın özünün dünyagörüşü dar idi.
Dəb bizimlə öləndir, dəyər bizdən sonra yaşayan!
Aqşin Yenisey
visiontv.az
