Amerika vətəndaşları Ukraynaya hərbi dəstək məsələsində hələ də fikir ayrılıqları ilə üzləşirlər.
Yenicag.az xəbər verir ki, bu, noyabrın 25-də dərc edilmiş “CBS/YouGov” sorğusunun nəticələrində öz əksini tapıb.
Sorğunun nəticələrinə görə, respondentlərin 49%-i hərbi dəstəyin davam etməli olduğunu bildirərkən, 51%-i buna qarşı çıxıb. Bu, Amerika cəmiyyətindəki fikir ayrılıqlarının daha da artdığını və dəstəyin azaldığını göstərir.
Yay aylarında aparılan sorğularla müqayisədə bu azalmanın daha da nəzərə çarpdığı görülür. Məsələn, “Pew” Araşdırma Mərkəzinin keçirdiyi sorğunun nəticələrinə görə, respondentlərin 54%-i ABŞ-nin Kiyevə hərbi yardımını davam etdirməsini dəstəkləyib. Reyqan İnstitutunun sorğusuna əsasən isə bu rəqəm 57%-ə çatıb.
Qeyd olunur ki, “CBS/YouGov” sorğusunda başqa bir sual da verilmişdir: Amerikanın Kiyevə yardımı nə dərəcədə prioritet məsələdir? Respondentlərin 33%-i bunu yüksək prioritet, 36%-i isə orta prioritet məsələsi olaraq qiymətləndirib. Həmçinin, 31%-i bu məsələnin, ümumiyyətlə, prioritet olmadığını bildirib. Eyni zamanda, Almaniyada Ukraynaya hərbi dəstək məsələsinə olan dəstəyin əvvəlki illərlə müqayisədə artdığı müşahidə olunub.
Yenicag.az
