"Berkshire Hathaway" şirkətinin icraçı direktoru Uorren Baffet bütün valideynlərə, "varlı olub-olmamaqlarından asılı olmayaraq", vəsiyyəti uşaqlarına imzalanmadan əvvəl oxumağı tövsiyə edib.
"Əmin olun ki, hər bir övladınız qərarlarınızın məntiqini və ölümünüzdən sonra qarşılaşacaqları məsuliyyəti başa düşür. Kiminsə sualı və ya təklifi varsa, onları diqqətlə dinləyin və məntiqli hesab etdiklərinizi qəbul edin",
- deyə Baffet öz məktubunda bildirib.
Valyuta.Az xəbər verir ki, məktubun məzmununu "CNBC News" yayıb.
Baffet hesab edir ki, uşaqların valideynlər hələ sağ ikən suallar verməsi daha yaxşıdır. O vurğulayıb ki, vəsiyyətin qeyri-müəyyənliyi və ya bərabərsizlik səbəbilə ailələrdə tez-tez "qısqanclıq və uşaqlıqdan qalan kinlər" güclənir və nəticədə ailələr parçalanır. "Öz mövqeyinizi müdafiə etməkdə heç bir problem görmürəm. Atam da eyni şeyi edirdi", – deyə o əlavə edib.
Baffetin ailəsi və miras planları
"Forbes" jurnalının qiymətləndirməsinə görə, 150 milyard dollarlıq sərvətə sahib olan Baffetin iki qızı və bir oğlu var:
► 71 yaşlı Syuzi Baffet "Şervud Fondu"na rəhbərlik edir və bu qurum məktəbəqədər təhsil sahəsində fəaliyyət göstərir.
► 66 yaşlı Hovard Baffet öz fondunu idarə edir. Fondun məqsədi qida təhlükəsizliyini təmin etmək və müharibə münaqişələrinin nəticələrini yüngülləşdirməkdir. O, eyni zamanda "Berkshire"ın idarə heyətinin üzvüdür.
► 66 yaşlı Piter Baffet isə "NoVo Fondu"na rəhbərlik edir. Fondun fəaliyyət istiqamətləri arasında ABŞ-da yerli xalqların dəstəklənməsi də yer alır.
Baffet 2006-cı ildən etibarən hər il beş xeyriyyə təşkilatına ianələr edir. İyunda "The Wall Street Journal"a verdiyi müsahibədə o, sərvətinin böyük hissəsini uşaqlarının idarəçisi olacağı xüsusi bir fonda köçürəcəyini açıqlayıb. Fond vəsaitin hansı xeyriyyə məqsədlərinə xərclənəcəyinə birgə qərar verəcək.
Son olaraq, Baffet xeyriyyəçiliklə bağlı fikirlərini gücləndirərək, "Berkshire Hathaway" səhmlərindən 1,2 milyard dollarlıq hissəni xeyriyyə təşkilatlarına bağışladığını açıqlayıb.
Rəhim
