1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Bir neçə gündür, sosial mediada sertifikasiyadan kəsilən müəllimlərin məktəblərdə direktor kimi fəaliyyət göstərmək üçün imtahan verməsi məsələsi müzakirə edilir.
Müzakirələrdə bəzi müəllimlərin sertifikasiyadan kəsiləndən sonra onlara verilən bir illik möhlət ərzində direktorluğa namizəd olaraq imtahan verdikləri bildirilir.
Maraqlıdır, bəs görəsən, bir il müddətində sertifikasiyadan keçməyən müəllim direktor olaraq fəaliyyət göstərə bilərmi?
Mövzu ilə bağlı Oxu.Az-ın suallarını cavablayan təhsil eksperti Elçin Əfəndi bildirib ki, şəxs direktorların işə qəbul imtahanlarında iştirak üçün müsabiqə şərtlərini ödəyərsə, lazımi göstəricini qazandıqdan sonra direktor olaraq fəaliyyətini icra edə bilər:
"Bu o deməkdir ki, şəxs artıq pedaqoji (müəllim) fəaliyyət göstərmək istəmir və direktor olaraq davam edəcək. Bu imkan şəxsə tanınır. Lakin şəxs direktor olduqdan sonra fənn müəllimi olaraq da işləmək istəsə, bu zaman onun həmin fənn üzrə sertifikasiya imtahanından keçməsi əsas şərtdir. Yalnız sertifikasiyadan keçdikdən sonra direktor olmaqla yanaşı, müəllim kimi də işləyə bilər. Direktorların sertifikatlaşdırılması prosesinə başlandığı təqdirdə şəxs tutduğu vəzifə üzrə sertifikasiyada iştirak edəcək".
Xatırladaq ki, təsdiq edilmiş qaydalara əsasən, direktor vəzifəsinə işə qəbul müsabiqəsində pedaqoji və ya idarəetmə ixtisas sahələri üzrə ali təhsili, beş ildən az olmayaraq pedaqoji stajı olan və hazırda ümumi təhsil müəssisələrində pedaqoji fəaliyyətlə məşğul olan şəxslər iştirak edə bilərlər. Təhsilin təşkili və idarəolunması ixtisası üzrə elmi dərəcəsi və elmi adı olduqda üçillik təcrübə ilə də direktorluğa namizəd olmaq mümkündür.
Təhsil müəssisələrində müvafiq ixtisas üzrə pedaqoji təhsilə malik olanlar, həmçinin müvafiq ixtisas üzrə pedaqoji təhsili olmayan ali təhsilli mütəxəssislər müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada pedaqoji fəaliyyətlə məşğul ola bilərlər. Lakin məhkəmənin qanuni qüvvəyə minmiş qərarı ilə pedaqoji fəaliyyətlə məşğul olması qadağan edilənlər, ağır, xüsusilə ağır cinayət törətməsinə görə məhkumluğu üstündən götürülməmiş və ya ödənilməmiş, fəaliyyət qabiliyyətsizliyinə və ya məhdud fəaliyyət qabiliyyətli olmasına, habelə barəsində tibbi xarakterli məcburi tədbirlərin tətbiqinə dair məhkəmənin qanuni qüvvəyə minmiş qərarı olan, müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilmiş siyahıda göstərilən xəstəliklərə görə pedaqoji fəaliyyətlə məşğul olmasına qadağa qoyulmuş, uşaqlara qarşı cinsi istismar və ya cinsi zorakılıqla bağlı cinayətə görə məhkum olunmuş şəxslər pedaqoji fəaliyyətlə məşğul ola bilməzlər. Həmçinin, müvafiq icra hakimiyyəti orqanının müəyyən etdiyi orqanın (qurumun) təsdiq etdiyi etik davranış qaydalarını pozduğuna görə əmək müqaviləsinə xitam verilmiş pedaqoji işçi bir il müddətində pedaqoji fəaliyyətlə məşğul ola bilməz.
Aygün Mirakif
