HƏMAS İsrail və Livan arasında atəşkəs elan edildikdən sonra Qəzza zolağında atəşkəs sazişi bağlamağa hazırdır. AFN.az xəbər verir ki, bu barədə “Frans Press” agentliyinə radikal təşkilatın adını açıqlamayan nümayəndəsi məlumat verib.“HƏMAS atəşkəs razılaşmasına və ciddi məhbus mübadiləsi razılaşmasına hazırdır. Livanda atəşkəsin elan edilməsi müqavimət qüvvələri üçün qələbə və böyük uğurdur", - deyə sözçü əlavə edib.Bundan əvvəl İsrailin hərbi-siyasi kabineti Livanda atəşkəs planını təsdiqləyib. Az sonra ABŞ prezidenti Co Bayden bəyan edib ki, İsrail və şiə Hizbullah təşkilatı arasında imzalanan razılaşmalar Livan qüvvələrinin 60 gün ərzində öz ərazilərinə nəzarəti bərpa etməsini nəzərdə tutur. Bundan sonra İsrail ordusu tədricən Livan ərazisindən geri çəkiləcək və hər iki tərəfdən mülki əhali tezliklə öz icmalarına təhlükəsiz qayıdacaq və onları yenidən qurmağa başlayacaq.
