F-1.az xəbər verir ki, Ferstappen sadəcə Lando Norrisi geridə qoyaraq dördüncü titulunu qazanmalı olub və bunu beşinci yeri tutaraq edib. Norris isə finişi altıncı yerdə keçib. Niderlandlı sürücü üçüncü yerdə gedərkən, son 10 dövrədə hər iki Ferrari onu keçib.
Bu arada, Rassell yarışın son dövrələrində Həmiltonun artan təzyiqi ilə üzləşib. Həmilton Oskar Piastri və Yuki Tsunodanı erkən dövrələrdə keçərək 10-cu yerdən irəliləyib. O, ilk bölümü uzadaraq pitdən Ferstappen, Ferrari-lər və Norrisin arxasına trasa qayıdıb. Ferrari-lərdə ağ təkərlərin ilk bölümün sonunda ilişməni itirməsi Həmiltona şans verib. Sürücülər ikinci dəfə bərk təkərlərə keçərkən Karlos Sayns Həmiltonun önündə pit-stop etməkdən son anda fikrini dəyişib. Bu, Həmiltona pit-stopdan sonra hər iki qırmızı maşını qabaqlamaq imkanı verib.
Həmilton 31-ci dövrənin sonunda Ferstappeni asanlıqla keçib və Rassellin ikinci pit-stopundan sonra ondan 10 saniyə geridə olub. Rassell aranı qorumağa çalışsa da, Həmilton sürətlə yaxınlaşıb. 40-cı dövrənin əvvəlində fərq 7.1 saniyəyə, iki dövrə sonra isə 5.7 saniyəyə düşüb. Ancaq bu nöqtədə Həmiltonun təkərləri aşınmağa başlayıb və fərq Rassellin xeyrinə sabitləşib. Bu, Rassellə 2024-cü ildə ikinci qələbəsini qazandırıb və komanda yoldaşı Həmiltondan 7.3 saniyə öndə finiş xəttini keçib.
Sayns komanda yoldaşı Şarl Lekleri pit-stopdan çıxarkən geridə saxlayaraq finişdə üçüncü yeri qoruyub. Lekler yarışın startında ikinci yerə yüksəlsə də, sarı təkərlərin ömrü 7 dövrədən sonra başa çatıb və sürücü erkən mərhələdə həm Saynsa, həm də Ferstappenə uduzub.
Hər iki Ferrari ilk bölümdə Ferstappenə mövqe versə də, bərk təkərlərdə qırmızı maşınlar daha inandırıcı görünüblər. Bu onlara niderlandlı sürücünü ötüb keçməyə imkan verib. Sayns 41-ci dövrədə, Lekler isə 46-cı dövrədə Ferstappeni keçiblər. Ferstappen Ferrari duetinə çox müqavimət göstərməyib, çünki əsas rəqibi Norrisi geridə qoyaraq dördüncü titulunu təmin edə biləcəyinə əmin olub.
Norris komanda yoldaşı Piastridən kifayət qədər öndə olduğu üçün mövqe itirmədən yumşaq təkərlərə keçərək yarışın ən sürətli dövrəsinə imza atıb. Piastri finişdə yeddinci, Nico Hülkenberq isə səkkizinci olublar. Hülkenberq Haas üçün vacib xallar qazandıraraq komandasını Mühəndislər Kubkokunda Alpine-in önünə keçirib. Üçüncü yerdən start götürən Pyer Qaslinin mühərrik nasazlığı şübhəsi ilə yarışdan kənarlaşması da buna kömək edib.
Visa RB komandası da Tsunodanın 9-cu yeri ilə çempionatda altıncı yer uğrunda mübarizəni davam etdirir. Serxio Peres sonuncu dövrədə Fernando Alonsonu qabaqlayaraq bir xal verən 10-cu yeri tuta bilib.
