Dünən Azərbaycanda növbəti bələdiyyə seçkilərinin vaxtı təyin olundu.
Mərkəzi Seçki Komissiyasının məlumatına görə, seçkilər 2025-ci il yanvarın 29-da baş tutacaq. Qurum artıq seçkilərin keçirirlməsi üzrə əsas hərəkət və tədbirlərin Təqvim Planını da təsdiq edib.
Maraqlıdır, hansı partiyalar bələdiyyə seçkilərində iştirak etmək niyyətindədir
Bizim.Media bu sualla bir neçə partiya sədrinə müraciət edib.
REAL Partiyasının sədri Natiq Cəfərli bildirib ki, rəhbərlik etdiyi siyasi partiya bu seçkidə çox yer qazanmağı hədəfləyib:
“Yerli özünüidarəetmə bizim partiya üçün üçün prioritet sahələrdəndir. Biz bu sahədə ciddi dəyişikliklərin olmasına, yeni qanunların qəbul edilməsinə, böyük şəhər bələdiyyələrinin yaradılmasına, bələdiyyələrinin səlahiyyətlərinin, məsuliyyətlərinin artırılmasına həmişə çağırışlar etmişik. Ona görə də REAL Partiyası bələdiyyə seçkilərində mütləq iştirak edəcək”.
Natiq Cəfərli qeyd edib ki, hansı bölgələrdən və hansı namizədlərlə iştirak edəcəkləri isə yaxın günlərdə partiya strukturlarında gedən müzakirələrdən sonra məlum olacaq:
“Biz elə bir yanaşma ortaya qoymaq istəyirik ki, bələdiyyələrin ən azından bir neçəsində tək partiya nümayəndəsi olmasın, həm də orda seçkini udaq.
Bələdiyyələrdə 11 üzvdən 19 üzvədək tərkib var. Orda ən azından yerlərin yarısını qazanmaq lazımdır ki, bələdiyyə idarəetməsində söz sahibi olasan. Ona görə də bir neçə bələdiyyədə tam tərkiblə iştirak etməyi düşünürük. İstəyirik, bütün bələdiyyə üzvləri yerlərinə namizədlərimiz olsun. Yaxın günlərdə bu məsələlərlə bağlı müzakirələr yekunlaşacaq və ictimaiyyətə məlumat verəcəyik”.
“Ajiotaj yoxdur “
Ağ Partiyanın sədri Tural Abbaslı da seçkidə iştirak edəcəklərini bildirib:
“Bələdiyyələrin Azərbaycan cəmiyyətindəki mövqeyi, təsir imkanları, yerlərdəki nüfuzu bəllidir. Ona görə deməzdim ki, bununla bağlı cəmiyyətdə bir ajiotaj var. Baxmayaraq ki, Türkiyədə bələdiyyə seçkiləri ən ajiotajlı seçkilərdir. Çünki minlərlə namizədlər, ciddi rəqabət olur.
Azərbaycanda da əslində 680 bələdiyyə var. 10 bələdiyyə üzvü ilə hesablasaq, 6500-dən artıq insan seçiləcək. Bu, ən kütləvi seçkilərdir. Amma buna baxmayaraq, cəmiyyətdə o qədər ajiotaj yoxdur. Çünki dediyim kimi, bələdiyyələrin səlahiyyətləri məhduddur. Onların gündəlik yaşam tərzinə təsir imkanları o qədər zəifdir ki, heç kimin həvəsi yoxdur. Buna baxmayaraq, biz seçkilər elan olunmamışdan qabaq partiyanın rayon təşkilatlarına məlumat vermişdik ki, maksimum çox adam namizədliyini verib bu prosesdə iştirak etsin”.
Abbaslı deyib ki, partiya bu prosesə həm də üzvlərinin seçki təcrübəsinin artırılması, onların seçiçilərlə işləmək qabiliyyətlərinin formalaşması, seçki kampaniyası haqqında anlayışlarının olması praktikası kimi yanaşır.
“300 nəfərlik siyahımız hazırdır”
AMİP sədri Arzuxan Əlizadə də sədri olduğu partiyanın bələdiyyə seçkilərinə qatılacağını deyib:
“Bələdiyyə seçkilərinin təyin olunmasını gözləyirdik. Müəyyən səbəblərdən təyinat gec oldu. Amma istənilən halda qanunvericiliyə uyğundur. Və biz partiya olaraq seçkiyə qatılacağıq. Bu prosesə bir müddət əvvəl başlamışdıq. Namizədlərimiz də müəyyən olunub. Təxminən 300 nəfərlik siyahımız hazırdır. Ola bilər bir qədər də artsın. Ayrı-ayrı bələdiyyələr üzrə namizədlərimizi irəli sürərək təmsil olunacağıq”.
Rəna Cumaqızı, Bizim.Media
- Ночной Режим
- Домашняя страница
- Статистика
- Источники
- Рейтинг
- Погода
- Валюта
