Gürcüstanın baş naziri İrakli Kobaxidze 2028-ci ilin sonuna qədər Avropa İttifaqı ilə danışıqların başlanması prosesinin dayandırıldığını açıqlayıb.
Bu vaxta qədər hakimiyyət qurumdan hər hansı qrant almaqdan imtina edir. Hökumət başçısı izah edib ki, bu danışıqların müzakirəsi cəmiyyəti parçalamaq üçün alətə çevrilib. Eyni zamanda o, 2030-cu ildə Aİ-yə daxil olmağı milli məqsəd adlandırıb. Bundan əvvəl Brüssel yayda ölkənin assosiasiyaya inteqrasiyasını dayandırdığını elan edib.
“Bizim vəzifəmiz Gürcüstanı Avropa ailəsinin tamhüquqlu üzvü etməkdir. Buna uyğun olaraq, bizim milli vəzifəmiz Gürcüstanı 2030-cu ildə Avropa İttifaqına üzv etməkdir və bunun üçün bütün səylərimizi sərf edəcəyik. Xüsusi vurğulamaq lazımdır ki, Gürcüstan-Aİ münasibətləri məzmunca ikitərəflidir və yalnız ikitərəfli ola bilər. Biz uzun tarixə malik olan qürurlu və özümüzə hörmət edən xalqıq, ona görə də Avropa İttifaqına inteqrasiyanı Avropa İttifaqının bizə göstərməli olduğu lütf kimi qəbul etməyimiz qətiyyən qəbuledilməzdir”, – deyə Kobaxidze brifinqdə bildirib. Baş nazir Brüsselin bir çox hərəkətlərini, o cümlədən Gürcüstan hökumətinə qarşı qətnamələrin qəbulunu tənqid edib. Xüsusilə, bu gün, noyabrın 28-də Avropa Parlamenti Gürcüstan hakimiyyətini pozuntuların aradan qaldırılması üçün “diqətli beynəlxalq nəzarət altında” yenidən parlament seçkiləri keçirməyə çağıran qətnamə qəbul edib. Avropa Parlamentinin deputatları hakim “Gürcü arzusu”nu demokratiyadan geri çəkilməkdə ittiham ediblər.
“Əvvəllər namizəd statusundan istifadə edildiyi kimi, danışıqların açılması şantaj, parçalanma vasitəsi kimi istifadə olunur. Bu, tamamilə süni bir hadisədir, xüsusən də açılış tarixi üzvlük tarixindən asılı olmayan danışıqlara münasibətdə”, – İrakli Kobaxidze vurğulayıb. “2030-cu ilə qədər bütün namizəd ölkələr arasında Gürcüstan Aİ üzvlüyünə ən çox hazır olan ölkə olacaq. Bu, bizim gürcü xalqına verdiyimiz sözdür və o, mütləq yerinə yetiriləcək”, – deyə baş nazir söz verib.
//Samir Qurbanov, Editor.az
