Noyabrın 29-30-da Tbilisidə keçirilən etiraz aksiyası zamanı 10 polis əməkdaşı yaralanıb. Hüquq-mühafizə orqanları əməkdaşlarının qanuni tələbinə tabe olmayan və kiçik xuliqanlıq səbəbindən 107 nəfər saxlanılıb. Bu barədə Gürcüstanın Daxili İşlər Nazirliyi (DİN) məlumat yayıb.
“DİN nümayəndələrinin çağırışlarına baxmayaraq, Rustaveli prospektində, parlament binasının yaxınlığında keçirilən mitinqin iştirakçıları yığıncaqlar və nümayişlər haqqında qanunla müəyyən edilmiş normaları dəfələrlə pozublar. Onlar bütün gecə boyu polisə müqavimət göstəriblər. Rustaveli prospektindəki insanlar hüquq-mühafizə orqanlarının əməkdaşlarına daşlar, pirotexniki vasitələr, şüşə butulkalar və metal kimi müxtəlif əşyalar atıblar. Nümayişçilərin zorakılıq hərəkətləri nəticəsində DİN-in 10 əməkdaşı xəsarət alıb. Hazırda bir polis əməkdaşı bədəninin müxtəlif nahiyələrində yanıq xəsarətləri ilə xəstəxanada qalır. Vətəndaşlar mitinq iştirakçılarının zorakılıq və qanunsuz hərəkətlərini müxtəlif televiziya kanallarında açıq şəkildə görüblər. Saysız çağırışa baxmayaraq, toplanan şəxslər Tbilisi Şəhər Bələdiyyəsi və özəl şəxslərin infrastrukturuna, parlamentin müdafiə baryerinə zərər yetirib, müxtəlif əşyaları və naqilləri yandırıb, barrikadalar qurub, parlamentin giriş qapılarına və binanın ətrafındakı təhlükəsizlik kameralarına ziyan vurublar”, - deyə məlumatda bildirilir.
Qeyd olunub ki, DİN əməkdaşları hüquq qaydasını bərpa etmək üçün qanunla müəyyən olunmuş xüsusi vasitələrdən istifadə ediblər. Cinayət Məcəlləsinin müvafiq maddələrinə əsasən, polisin qanuni tələbinə tabe olmamaq və kiçik xuliqanlıq səbəbindən hüquq-mühafizə orqanları 107 nəfəri saxlayıb.
