Tbilisidə keçirilən etirazlarda Gürcüstan Daxili İşlər Nazirliyinin (DİN) 42 əməkdaşı ciddi xəsarətlər alıb.
Teleqraf.com xəbər verir ki, bu barədə Gürcüstanın daxili işlər nazirinin müavini Aleksandre Daraxvelidze keçirdiyi brifinqdə bildirib.
Onun sözlərinə görə, həmin şəxslər müxtəlif travmalar, həmçinin yanıq xəsarətləri və sınıqlarla tibb müəssisələrinə çatdırılıblar.
DİN rəsmisi deyib ki, ötən gecə etirazçılar Rustaveli prospektində yerləşən özəl və şəhər infrastrukturuna ziyan vurublar, zibil qutuları və taxta oturacaqları yandırıblar.
Daraxvelidze aksiya iştirakçılarına bir daha xəbərdalıq edərək onları qanunun yol verdiyi çərçivələr daxilində etiraz etməyə çağırıb.
“Əks halda Daxili İşlər Nazirliyi vəziyyətin gərginləşməsinin qarşısını almaq üçün qanunla nəzərdə tutulmuş bütün tədbirləri görəcək”, - nazir müavini deyib.
