“ “Ay ev yiyəsi” verilişi 15 ildir ki, efirdədir. Teleməkanın ən uzunömürlü verilişlərindən biridir. Bilirsiniz ki, biz qapını döyürük və qəfil evərə qonaq oluruq. Bu 15 ildə bir dəfə problem yaşamışam, o da Corat kəndində. Səhv etmirəmsə 2012-ci il idi. Evin qapısını döymüşük, qapını xoşluqla üzümüzə açıblar, gözəl çəkiliş etmişik. Ana, balaca qardaşlar, qohum-əqraba hamısı çəkiliblər. Böyük qardaş sən demə Bakıda işləyirmiş. Qonşular ona deyib ki, sizin evdə çəkiliş gedir. Bu da zəng edib evə, telefonu götürməyiblər. Çünki çəkiliş vaxtı telefonların səsini aldırıram. Bir də gördük ki, etməyib tənbəllik, şəhərdən durub birbaşa evə gəlib. Biz də çəkilişi bitirmişdik, dedik ki, oturub çay içək. Oğlan gəlib bacısının, ailəsinin üstünə əməlli başlı hücum çəkdi. Özü də “kuvalt” deyilən küt alətlə.. Məni qonşu evlərinə qaçırtdı. Veriliş o vaxt Lider tv-də gedirdi. Operatorumun üstünə gəldi, telekanalın maşınını vurub əzdi. Sən demə o bizdən kartı istəyirmiş. Bunu əslində normal şəkildə də deyə bilərdi. Mən də etiraz etməzdim. Qonşu gördü ki, çox pis olmuşuq. Qonağım da o vaxt “Kristal” qrupunun rəhbəri Mədinə Məlik və qrup üzvləri idi. Çəkilişi həmin qonşunun evində etdik. Verilişin adı bir neçə ildir ki, “Kim var, kim yox?” -dur. Artıq 4 ildir ki, ayda bir dəfə qazi və şəhid ailələrinə də gedib onların qəhrəmanlıqlarını işıqlandırıb, ailə üzvləri ilə masa arxasında həmsöhbət oluram”
Bunu Moderator.az-a açıqlamasında tanınmış teleaparıcı Lalə Əlimuxtarova deyib. Aparıcı bildirib ki, tamaşaçı yaxşı ilə pisi seçə bilir:
“Artıq məni heç nə narahat etmir. İstər aparıcı ol, istərsə də hansı sahədə olursansa ol, hər kəs öz nüfuzunu, adını, sanbalını, səviyyəsini göstərir. Elin gözü tərəzidir. Hamı hər kəsi tanıyır, hər şeyi yaxşı bilir. Mənə heç kəs maraqlı deyil, çünki hamı özünə cavabdehdir” deyə o bildirib.
Lalə Əlimuxtarova bildirib ki, müğənnilərlə bir çox hallarda uzunmüddətli dostluqlar baş tutmur:
“100 faizdən 5 faizi ilə dostluqlar baş tutur. Hər insanın yaxşısı və pisi olduğu kimi, müğənninin də yaxşısı pisi olur. Elə insanlar var deyir ki, müğənnilərin çörəyi dizlərinin üstündədir. Vəzifəyə qalxan adi insanlar belə dəyişir. Müğənnilik də populyar bir sənətdir. Məşhurlaşdıqca artıq kənara çəkilirlər, hamıdan uzaqlaşmağa başlayırlar, çoxusu da məşhurluğa qədər gəldikləri yolu unudurlar. Çünki məşhurluq başlarını gicəlləndirir. Bu sözlərim təbii ki, onların hamısına aid deyil. Bu əvvəllər belə deyildi, son zamanlar belə oldu. Bəzi müğənnilər sonradan görənlərdəndir. Görməyib birdən görən müğənni də tez yolunu azır, başlayır kimlərisə saymamağa. Amma təəssüflər olsun başa düşmürlər ki, belə etmək olmaz. Çünki sabahdan heç kim sığortalanmayıb. İnsan sağlığında da, dünyasını dəyişəndən sonra da rəhmət qazanmalıdır. Kim bilərdi ki, Rəhim Rəhimli dünyasını tez dəyişəcək? Amma ona hamı rəhmət oxuyur. Çünki gənclərə ömür boyu dəstək olub, özünü göylə aparmayıb, özünü qudurğan kimi göstərməyib, sadə, hər kəsə sadiq, hər kəsin əlindən tutan biri olub.
Amma bugünki bəzi gənclərə baxın.. 5 gündür tanınırlar, heç kimi saya saymırlar, böyük-kiçik bilmirlər. Amma dostluq etməyə dəyər insanlar da var. İllərlə dostluq etdiyim, bacılıq, qardaş-bacılıq, bacı-bacılıq etdiyim adamlar var. Bunlardan birincisi məhz sənətkar Faiq Ağayevdir. Ondan o yanası yoxdur ki! Amma baxın necə sadədir! Böyüklə də, kiçiklə də necə rəftar edəcəyini bilir. Çox gözəl insandır. İllərdir bacı-qardaşlıq edirəm onunla. Müğənni Samira Əliməryəm də illərdir dostluq etdiyim insanlardandır. Sənəti, insanlığı göz qabağındadır. Röya Ayxan da mənim sadə və səmimi dostlarımdandır. Hələ onlardan əvvəlki yaşlı nəsili demirəm. 24 ildir ki, televiziyadayam, hamısını görmüşəm. O korifey sənətkarların əksəriyyəti indi həyatda yoxdur. 2018-2019-cu ildən sonra meydana gələn müğənnilərin heç biri ilə dostluq etməyə dəyməz. Şəxsən mən onlarla dostluq etmərəm. Onların içərisində də barmaq sayı qədər məşhurlar var ki, hər kəsə hörmətlə yanaşırlar” deyə teleaparıcı bildirib.
