Filippo sosial şəbəkədə yazıb: "Dünyada "şahinlər" tərəfindən yaradılmış partlayışa hazır vəziyyətdə olan mühitdə, Trampın hakimiyyətə gəlməsindən əvvəl Makron və Zelenski işi sürətləndirə və fransız əsgərlərini Ukraynaya göndərə bilərlər."
Zelenski, Almaniyanın kanslerliyinə namizəd Fridrix Merslə birgə keçirdiyi mətbuat konfransında, Makronun Ukrayna ərazisində Avropa qoşunlarının yerləşdirilməsi təklifi barədə danışıb. Bu təklif, Ukraynanın NATO-ya daxil olmasından əvvəl həyata keçirilə bilər.
Bundan əlavə, Zelenski ABŞ və Fransa liderləri ilə görüşlərdə Rusiya ilə münaqişənin dondurulması məsələsini müzakirə etdiyini qeyd edib. O vurğulayıb ki, münaqişənin bitməsi yalnız güc mövqeyindən sülhə məcbur etməklə mümkündür.
Xatırladaq ki, Avropa İttifaqının yeni xarici işlər rəhbəri Kaya Kallas dekabrın əvvəlində Avropa qoşunlarının mümkün atəşkəsi təmin etmək məqsədilə Ukraynaya göndərilməsi ehtimalını istisna etməyib. Bu mövzuda Avropada aktiv müzakirələr aparılır.
