Suriyanın devrilən Bəşər Əsəd rejimi həm də özünün ermənipərəstliyilə seçilirdi. Özünü İslam ölkəsi hesab etsə də, Əsədin dövründə rəsmi Dəməşq beynəlxalq tədbirlərdə belə Azərbaycanın deyil, Ermənistanın maraqlarından çıxış edib.
Əsəd rejimin ermənipərəst mövqeyi
Suriya dəfələrlə İslam Əməkdaşlıq Təşkilatı çərçivəsində Azərbaycanın maraqlarına qarşı çıxıb. Bu kontekstdə Ermənistanla bağlı qətnamələri əngəlləməyə çalışıb, İrəvana qarşı qəbul olunan sənədlərə qoşulmayıb.
Bundan başqa, Əsəd rejimi İrəvanla yaxın əlaqələr yaradıb. 90 mindən çox Suriya ermənisi Azərbaycanın vaxtilə işğalda olan ərazilərində yerləşdirilmişdi. Paşinyan bir neçə dəfə Əsədi seçkilərdə qələbə münasibətilə təbrik edib.
Habelə Ermənistan hərbçiləri minatəmizləmə adı altında Hələbdə xidmət ediblər. Bu yolla da Ermənistan hərbi kontingenti Əsədin dövründə Suriya ordusunun fəaliyyətinə dəstək verib.
Bütün bunlar onu göstərir ki, Əsəd rejiminin çökməsi Ermənistana da ciddi zərbədir. Bundan başqa, Əsədin siyasi səhnədən getməsi Hindistana, Fransaya da böyük zərbədir. Belə ki, Əsəd Kəşmir məsələsində Hindistanı dəstəkləyib, Makronun isə Əsədlə şəxsi münasibətləri və əlaqələri olub. Deməli, Suriyada yaranmış yeni situasiyada onlar da zərbə alacaqlar.
Suriyada yeni dönəm
Ötən gün Azərbaycan Respublikasının Prezidenti İlham Əliyev Türkiyə Respublikasının Prezidenti Rəcəb Təyyib Ərdoğana zəng edib. Telefon danışığı zamanı Cənubi Qafqaz və Yaxın Şərq regionuna aid məsələlərə toxunulub, xüsusilə Suriyada Əsəd rejiminin çökməsindən sonra yaranmış vəziyyət müzakirə olunub. Hər iki lider bu münasibətlə Suriya xalqına təbriklərini, Suriya dövlətinin ərazi bütövlüyünə və suverenliyinə dəstəklərini ifadə ediblər.
Prezident İlham Əliyev bundan sonra Türkiyənin yaxın dəstəyi ilə Suriyada sabitlik dövrünün başlayacağına ümidvar olduğunu bildirərək Azərbaycanın qardaş Türkiyə ilə birlikdə Suriya xalqının üzləşdiyi humanitar problemlərin aradan qaldırılmasına dəstək verməyə hazır olduğunu qeyd edib.
Prezident Rəcəb Təyyib Ərdoğan bütün sahələrdə olduğu kimi Suriya xalqına humanitar yardım və dəstək məsələsində də Azərbaycan və Türkiyənin birgə fəaliyyət göstərəcəyini məmnuniyyətlə vurğulayıb.
“Bakı ilə Ankaranın birgə hərəkəti məhz bu zərurətdən irəli gəlir”
Mövzu ilə bağlı Bizim.Media-ya açıqlamasında Milli Məclisin deputatı Hikmət Babaoğlu bildirir ki, Bəşər Əsəd daima Ermənistanla münasibətlərə xüsusi önəm verib:
“Yaxın Şərqdə Suriyada baş verən proseslər kontekstində 2001-ci ildən başlayan tarixi era sona çatmaqdadır. Burada yaranacaq vəziyyət həm beynəlxalq hüquq, həm də regionun sosial-siyasi identivliyi və inklüzivliyi baxımından keyfiyyətcə tamamilə yeni eradır. Burada yeni münasibətlər sisteminin yaranacağı gözlənilir. Bu günlərdə Azərbaycan Prezidentinin Türkiyə Prezidentilə telefon danışığında da Suriyaya münasibətdə ortaq fəaliyyətin həyata keçirilməsi, bu ölkənin yenidən qurulmasında Bakı ilə Ankaranın birgə hərəkəti də məhz bu zərurətdən irəli gəlir.
Amma Suriya Azərbaycan münasibətlərinin keçmişi o qədər də xoş olmayıb. Bu ölkənin devrilmiş prezidenti Bəşər Əsəd daima Ermənistanla münasibətlərə xüsusi əhəmiyyət verib”.
Deputat qeyd edir ki, Əsəd beynəlxalq təşkilatlarda Ermənistana qarşı bir sıra qərarların qəbul edilməsinə qarşı çıxıb:
“Beynəlxalq təşkilatlarda Azərbaycanın haqlı mövqeyilə bağlı məsələlər müzakirə olunanda Suriya ölkəmizin tərəfində olmayıb. Əsəd hakimiyyəti dünyanın digər yerlərində hüquqları pozulan müsəlmanların qorunmasında İslam Əməkdaşlıq Təşkilatının mövqeyindən çıxış etməyib. Əksinə, islamofob, ermənipərəst mərkəzlərin mövqeyindən çıxış edib.
Bəşər Əsəd bəzi qonşu ölkələrlə birlikdə Azərbaycana qarşı sinxron hərəkət edib, terrorizmi dəstəkləyib. O, habelə erməni hərbi qüvvələrinin fəaliyyət göstərməsi üçün Hələbdə xüsusi təminat məntəqələri yaradıb”.
Münasibətlərdə yeni mərhələ başlayır
Deputat düşünür ki, Suriyada baş verən proseslər Bakı ilə Dəməşq arasında münasibətlərdə də yeni mərhələ yaradacaq:
“Bu da ortaq dəyər və maraqlar üzərindən müəyyənləşən münasibətlər olacaq. Həmçinin, Azərbaycan və Suriya üçün yeni perspektivlər yaradacaq. Ermənilərin Azərbaycana qarşı silahlandırılması məsələsində də Bəşər Əsəd rejiminin əlaqəsi olub. İran üzərindən Ermənistana hərbi yüklərin daşınmasında da müəyyən mənada terror koridorundan istifadə edilirdi. Hətta bəzi mənbələrin məlumatına görə, vaxtilə Qarabağa yerləşdirilən livanlı terrorçuların bura gətirilməsi də Livan, Suriya, İran və Ermənistan xəttilə mümkün olub. Ona görə bütün bunların tarxin arxivinə göndərilməsi milli maraqlarımız baxımından olduqca mühümdür. Yeni Suriya ilə isə Azərbaycan yeni münasibətlər qurmağa hazırdır”.
Rüfət Sultan, Bizim.Media
- Ночной Режим
- Домашняя страница
- Статистика
- Источники
- Рейтинг
- Погода
- Валюта
