Qobustan, 14 dekabr, Rəşad Türkoğlu, AZƏRTAC
Yağan qar və güclü çovğun Bakı-Şamaxı-Yevlax avtomobil yolunun Qobustan rayonundan keçən hissəsində yol qəzalarına səbəb olub.
AZƏRTAC-ın bölgə müxbiri xəbər verir ki, buzlaşmanın olduğu ərazilərdə hərəkət edən bəzi avtomobillər idarəetmədən çıxaraq bir-birinə çırpılıb. Qəzalar zamanı ölən və xəsarət alanlar olmasa da, avtomobillərə zərər dəyib.
Yolların qardan təmizlənməsi üçün səhər saatlarından əraziyə Azərbaycan Avtomobil Yolları Dövlət Agentliyinin texnikası və canlı qüvvəsi səfərbər olub. Hazırda yolun buz və qardan təmizlənməsi üçün 4 nömrəli Magistiral Yol İstismarı MMC-nin əməkdaşları fasiləsiz xidmət aparırlar.
Hazırda bölgədə qar yağmasa da, şaxtalı hava müşahidə olunur.
