Qrip və soyuqdəymə epidemiyaları dövründə isti çay kəskin respirator virus infeksiyalarının (KRVİ) müalicəsi və qarşısının alınmasının ən geniş yayılmış üsullarından birinə çevrilir.
Rusiyalı pediatr Viktoriya Şurupova bildirib ki, bitki çayları təkcə su balansını saxlamağa kömək etmir, həm də xəstəliyin simptomlarını yüngülləşdirə bilən bir sıra faydalı xüsusiyyətlərə malikdir. Soyuqdəymə ilə mübarizədə ən populyar vasitələrdən biri çobanyastığı çayıdır.
Şurupova xatırladıb ki, bu içki iltihabəleyhinə və sakitləşdirici xüsusiyyətləri ilə məşhurdur, iltihabi prosesləri azaldır, ağrı hissini azaldır və antiseptik xüsusiyyətlərə malikdir. Çobanyastığı, həmçinin orqanizmin bərpasında mühüm rol oynayan yuxu keyfiyyətinin yaxşılaşmasına kömək edir.
Pediatrın sözlərinə görə, nanəli çay da rahatlaşdırır və nəfəs almağı asanlaşdırır, zəncəfilli çay isə məşhur iltihabəleyhinə və bəlğəmgətirici xüsusiyyətlərə malik olmaqla immuniteti dəstəkləyir. İtburnu C vitamini və digər qiymətli mikroelementlərlə zəngindir ki, bu da immun sistemini gücləndirir və sağalma prosesini sürətləndirir. Cökə çayı tərlədicı təsiri sayəsində hərarəti aşağı salır və soyuqdəymə əlamətlərini yüngülləşdirir.
“Bəzi çaylar müəyyən insanlar üçün əks göstəriş ola bilər. Məsələn, qara çay tərkibində yüksək kofein olduğuna görə hipertoniya və ya yuxusuzluqdan əziyyət çəkənlər üçün məsləhət görülmür. Yaşıl çay böyük miqdarda qastrit və ya xora zamanı mədəni qıcıqlandıra bilər. Çobanyastığı və ya nanə kimi bitki çayları bu bitkilərə həssas olan insanlarda allergik reaksiya yarada bilər”, – deyə həkim bildirib.
Mütəxəssis, həmçinin çayı simptomları əhəmiyyətli dərəcədə yüngülləşdirə və sağalmanı sürətləndirə bilən əlavələrdən istifadə etməklə içməyi təklif edib. Məsələn, sarıkök iltihabəleyhinə xüsusiyyətlərinə görə soyuqdəymə zamanı içkiyə əlavə ola bilər. Bağ melissası rahatlamağa, stressi azaltmağa və yuxunu yaxşılaşdırmağa kömək edir, moruq isə tərlədicı təsiri sayəsində hərarəti aşağı salır və sağalma prosesini sürətləndirir.
“Soyuqdəymə zamanı bitki çayı orqanizmi dəstəkləmək və xoşagəlməz simptomları aradan qaldırmaq üçün əla üsuldur. Lakin bu, sağalmağa kompleks yanaşmanın yalnız bir hissəsidir. Ondan ağılla, xoş və faydalı ritual kimi istifadə edin, lakin əsas müalicə üsullarını unutmayın”, – deyə Şurupova yekunlaşdırıb.
