Moskva, 16 dekabr, AZƏRTAC
Rusiya ordusunda pilotsuz sistemlərdən ibarət qoşunların yaradılması planlaşdırılır.
AZƏRTAC xəbər verir ki, bu barədə Rusiyanın müdafiə naziri Andrey Belousov Nazirliyin kollegiyasının genişləndirilmiş iclasında məlumat verib.
Onun sözlərinə görə, 2025-ci ilin üçüncü rübündə Rusiya ordusunda yeni qoşun birləşməsi - pilotsuz sistemlər qoşunları yaradılacaq.
Müdafiə Nazirliyinin rəhbəri onu da bildirib ki, Rusiyada böyük mühafizə bazaları eşelonlaşdırılmış anbarlar şəbəkəsi ilə əvəz olunacaq.
A.Belousov gələcəkdə Rusiya ilə NATO arasında münaqişənin olacağını istisna etməyib. O qeyd edib ki, Rusiya Müdafiə Nazirliyinin fəaliyyəti yaxın onillikdə NATO ilə mümkün hərbi münaqişəyə tam hazırlığı təmin etməyə yönəlib. Onun fikrincə, alyans sammitində qəbul edilən qərarlar və doktrinal sənədlər belə bir münaqişənin mümkünlüyündən xəbər verir.
Fəridə Abdullayeva
AZƏRTAC-ın xüsusi müxbiri
Moskva
