DİN Polis Akademiyası Masallıda görüşlər keçirib
Masallı rayonunun ümumtəhsil müəssisələrində Daxili İşlər Nazirliyi sistemində təhsilə və xidmətə təşviqlə bağlı təbliğat xarakterli görüşlər keçirilib.
Daxili İşlər Nazirliyinin Polis Akademiyası tərəfindən keçirilən tədbirlərdə DİN Polis Akademiyasının nümayəndəsi, polis polkovnik-leytenantı Eldəniz Kazımov, Masallı Rayon Polis Şöbəsinin rəis müavini, polis mayoru İxtiyar Talıbov, Lənkəran-Astara Regional Təhsil İdarəsinin Masallı rayonu üzrə sektorunun məsləhətçisi Hörmət Balakişiyevi, məktəb direktorları və IX-XI sinif şagirdləri iştirak ediblər.
Görüşdə polis akademiyasına qəbul qaydaları, ali təhsil ocağında gənclərin hərtərəfli inkişafı üçün yaradılan müasir şərait, zəngin kitabxanalar, xarici dil kursları, laboratoriyalar, yataqxanalar, idman və atıcılıq yerləri, habelə asudə vaxtlarının səmərəli təşkili məqsədilə görülən işlər diqqətə çatdırılıb.
Yeniyetmə və gənclərin təhsilə həvəsləndirilməsi, sağlam həyat tərzinin təbliği, eləcə də onlarda vətənpərvərlik hissinin daha da yüksəldilməsi yönümündə məktəblilərə müəyyən tövsiyələr verilib.
Şagirdləri maraqlandıran suallar cavablandırılıb.
Akif AĞAYEV
