2024-cü ilin yanvar-noyabr aylarında Türkiyənin Ceyhan limanı 951 gəmi qəbul edib.
Fins.az xəbər verir ki, bu barədə Türkiyənin Nəqliyyat və İnfrastruktur Nazirliyindən məlumat verilib.
Nazirliyin məlumatına görə, bu dövrdə Ceyhan limanına Türkiyə bayrağı altında üzən 59, digər ölkələrin bayraqları altında üzən 892 gəmi qəbul edilib.
Bundan əlavə, 2024-cü ilin noyabr ayında Türkiyə limanları ümumilikdə 32,47 milyon ton yük qəbul edib. Həmin dövrdə Türkiyə bayrağı altında üzən gəmilərlə daxili limanlara 2,44 milyon ton yük çatdırılıb. Digər ölkələrin bayraqları altında olan gəmilərlə isə 30,03 milyon ton yük daşınıb.
Nazirlikdən verilən məlumata görə, 2024-cü ilin noyabrında Türkiyə limanlarından 5,96 milyon ton transit yük daşınıb.
2024-cü ilin yanvar-noyabr aylarında Türkiyə limanları 363,84 milyon ton yük qəbul edib. Bunun 27,49 milyon tonu Türkiyə bayrağı altında üzən gəmilərlə, 336,35 milyon tonu isə digər ölkələrin bayraqları altında üzən gəmilərlə daşınıb.
Həmçinin, bu dövrdə Türkiyə limanlarından 63,52 milyon ton transit yük daşınıb.
Qeyd edək ki, 2024-cü ilin noyabr ayında Türkiyə limanları 4 373 gəmi qəbul edib. Bunlardan 2 966-sı digər ölkələrin, 1 407-si isə Türkiyə bayrağı altında üzən gəmilər olub.
Ümumilikdə, 2024-cü ilin yanvar-noyabr aylarında Türkiyə limanları 56 086 gəmi qəbul edib. Bunun 36 550-si digər ölkələrin bayraqları altında, 19 536-sı isə Türkiyə bayrağı altında üzən gəmilər olub.
