FIFA “The Best” təqdimatı üzrə müvafiq seçimlər əsasında qaliblərin adlarını açıqlayıb, həmçinin cari ilin rəmzi komandasını müəyyən edib.
Arena.az məlumat verir ki, baş mükafatı – cari ilin ən yaxşı oyunçusu mükafatını “Real”ın braziliyalı ulduz hücumçusu Vinisius Junior qazanıb.
Səsvermənin nəticələrinə əsasən, “Vini” bu rəqiblərini qabaqlayıb: Cud Bellingem, Kilian Mbappe, Daniel Karvaxal, Federiko Valverde (hamısı “Real”), Lionel Messi (“İnter Mayami”), Lamin Yamal (“Barselona”), Erlinq Haland, Rodri (hər ikisi “Mançester Siti”), Florian Virts (“Bayer”) və futbolçu karyerasını bitirmiş Toni Kroos.
Mükafat oyunçuların 21 avqust 2023-cü ildən 10 avqust 2024-cü ilə qədər göstərdiyi səmərəni nəzərə alıb. Qalib, milli komandaların kapitanları və məşqçiləri, azarkeşlər və eləcə də mətbuat nümayəndələrinin səsverməsi nəticəsində müəyyən edilib.
2024-cü ilin ən yaxşı məşqçisi
“Real”ın baş məşqçisi, italyan mütəxəssis Karlo Ançelotti 2024-cü ilin ən yaxşı məşqçisi seçilib. Ançelotti “Real”a İspaniya La Liqasını, UEFA Çempionlar Liqasını qazandırıb.
Ən yaxşı məşqçi adına səsvermədə Ançelotti bu mütəxəssisləri qabaqlayıb: Lionel Skaloni (Argentina yığması), Luis de la Fuente (İspaniya yığması), Xosep Qvardiola (“Mançester Siti”), Xabi Alonso (“Bayer”).
2024-cü ilin ən yaxşı qapıçısı
Argentina yığmasının və “Aston Villa”nın qapıçısı Emiliano Martines 2024-cü ilin ən yaxşı qapıçısı seçiib.
2024-cü ilin ən yaxşı qolu
“Mançester Yunayted”in argentinalı hücumçusu Alexandro Qarnaçonun İngiltərə Premyer Liqasının 2023/2024-cü illər mövsümünün 13-cü turunda “Everton”la oyunda (3:0) başı üzərindən aşırma zərbə ilə vurduğu qol, 2024-cü ilin ən yaxşı qolu seçilib. Qarnaço müvafiq “Puşkaş mükafatı”nı qazanıb.
Həmin qolun videosunu bu keçiddən istifadə etməklə izləyə bilərsiniz: https://www.youtube.com/shorts/0Rvcv2tFpqU
2024-cü ilin rəmzi komandası
FIFA-nın “The Best” təqdimatı üzrə 2024-cü ilin rəmzi komandası:
Qapıçı: Emiliano Martines (“Aston Villa”, Argentina);
Müdafiəçilər: Daniel Karvaxal (“Real”, İspaniya), Ruben Diaş (“Mançester Siti”, Portuqaliya), Vilyam Saliba (“Arsenal”, Fransa), Antonio Rüdiger (“Real”, Almaniya);
Yarımmüdafiəçilər: Rodri (“Mançester Siti”, İspaniya), Toni Kroos (“Real”, Almaniya – futbolçu karyerasını bitirib), Cud Bellingem (“Real”, İngiltərə);
Hücumçular: Lamin Yamal (“Barselona”, İspaniya), Erlinq Haland (“Mançestet Siti”, Norveç).
