İspaniya sosial media və rəqəmsal platformalarda saxta xəbərlərlə mübarizə aparmaq üçün dezinformasiyanın ictimai korreksiyasını tələb edən qanun layihəsi hazırlayıb.
"Cebheinfo.az" xəbər verir ki, İspaniyanın solçu hökuməti saxta xəbərlərlə mübarizədə rəqəmsal platformalar və sosial media təsir edənləri əhatə edən qanun layihəsini açıqlayıb.
Yeni tənzimləmə yalan və ya çaşdırıcı məlumatların ictimaiyyət tərəfindən korreksiyasını tələb edir.
İspaniya Ədliyyə Nazirliyindən verilən məlumata görə, qanun layihəsi bir platformada 100 mindən çox və ya birdən çox platformada ümumilikdə 200 min izləyicisi olan istifadəçiləri əhatə edir.
Bu şəxslər və onlara ev sahibliyi edən platformalar vətəndaşların dezinformasiyaya düzəliş tələb etmələrini asanlaşdıran mexanizm təmin etməli olacaqlar.
Ədliyyə naziri Feliks Bolanos, "Biz saxta xəbərlər və dezinformasiya yayanların işini çətinləşdiririk. Bu, demokratiya üçün yaxşı xəbərdir" deyərək qanun layihəsinin əhəmiyyətini vurğulayıb.
İstehlakçı Hüquqları Assosiasiyası FACUA tənzimləməni alqışlayıb və vətəndaşların "ləyaqətini qorumaq" üçün addımlar ata biləcəyini bildirib.
Qanun layihəsi hökumətin bu il başlatdığı “demokratik yeniləşmə” planının bir hissəsidir. Planın məqsədi saxta xəbərlərin siyasi məqsədlər üçün istifadə edilməsinə və Baş nazir Pedro Sançesi və ailəsini hədəf almasına qarşı tədbir görməkdir.
Qanun layihəsi parlamentə təqdim edilməzdən əvvəl məsləhətləşmə prosesindən keçəcək. Təsdiq olunarsa, bu, Avropada saxta xəbərlərlə mübarizədə mühüm addım olacaq.
