“Suriyada cəmi 12 günün içində Əsəd rejiminin süqutu İran mühafizəkarları arasında şok effekti yaradıb, özlərinə gələ bilmirlər”.
“AzPolitika” xəbər verir ki, bu barədə politoloq Elxan Şahinoğlu bildirib.
Ekspert xatırladır ki, mühafizəkarlar illər boyu milyardlarla dolları İran vətəndaşlarının boğazlarından kəsib Əsəd rejiminin ayaqda durması üçün xərclədilər.
O, vurğulayır ki, Əsəd rejiminin süqutu ilə bu pulların havaya sovrulduğu anlaşıldı: “İndi də mühafizəkarlara bağlı iranlı deputat deyir ki, Suriyanın yeni rejimi “30 milyar dollarımızı geri qaytarsın”. İran bu pulları Əsəd rejiminə ona görə verirdi ki, o “Heyəti Təhriri Şam” (HTŞ) kimi silahlı qruplarla mübarizə apara bilsin. HTŞ ona qarşı istifadə edilən milyardları hansı məntiqlə İrana geri qaytarmalıdır? Bəlkə də həmin pulun bir hissəsini Əsəd təyyarədə Moskvaya daşıyıb. Tehran pulunu Moskvada gizlənən Əsəddən istəməlidir. Ancaq həm Əsəd, həm də onun pulları artıq Kremlin girovluğundadır. İran vətəndaşları isə həmin deputatdan və onun kimi düşünənlərdən soruşa bilərlər ki, “bizə aid olan 30 milyardı niyə süquta uğrayan rejimə xərclədiniz?”
E.Şahinoğlu vurğulayır ki, İranda Əsəd rejiminin süqutuna sevininlər də az olmaz. Onun sözlərinə görə, bu insanlar tənqid etdikləri mühafizəkarlardan Əsədə xərclənən milyardların hesabını istəyəcəklər..
“AzPolitika.info”
