PSJ-nin müdafiəçisi Nuno Mendeş karyerasını İngiltərə Premyer Liqasında davam etdirə bilər.
News24.az xəbər verir ki, "Mançester Yunayted" portuqaliyalı futbolçunu transfer etmək istəyir. Bu barədə "Sky Sports" televiziyasının əməkdaşı Florian Plettenberq məlumat yayıb.
Mendeş PSJ-nin yeni müqavilə təklifini qəbul etməyib. 22 yaşlı sol cinah müdafiəçisi karyerasını başqa klubda davam etdirmək niyyətindədir.
Nuno Mendeşlə "Mançester Yunayted"in baş məşqçisi Ruben Amorimin meneceri eyni şəxsdir. Bu amil də arxa xətt oyunçusunun İngiltərə klubuna keçmək ehtimalını qüvvətləndirir.
Qeyd edək ki, PSJ Nuno Mendeşi 2021-ci ilin yayında "Sportinq"dən transfer edib. Portuqaliya millisinin üzvü bu mövsüm Paris təmsilçisinin heyətində meydana çıxdığı 15 rəsmi matçda 2 qol və 2 məhsuldar ötürmə ilə yadda qalıb. Onun klubla müqaviləsi 2026-cı ilin yayına kimi nəzərdə tutulur.\\Sportal.az
