1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Braziliyada Tokantins və Maranyan ştatlarını birləşdirən yolda avtomobil körpüsü çöküb. Hadisə zamanı onun üzərində olan avtomobillər, o cümlədən təhlükəli kimyəvi maddə daşıyan yük maşınları çaya düşüb. Ölənlər və itkin düşənlər var.
Oxu.Az-ın "G1" portalına istinadla verdiyi məlumata görə, çökmə yerli bloqerin təxminən 60 il əvvəl tikilmiş körpünün acınacaqlı vəziyyəti haqqında reportaj çəkdiyi zaman baş verib.
Kadrlardan görünür ki, əvvəlcə yol örtüyünün kiçik bir hissəsi çöküb, sonra isə çayın iki sahili arasındakı bütün aşırım hissəsi uçub.
Bildirilir ki, körpünün çökməsi nəticəsində üç yük maşını, üç motosiklet və bir neçə minik avtomobili suya düşüb.
Ölən və yaralananların dəqiq sayı hələ müəyyən edilməyib. İki nəfərin ölümü təsdiqlənib, iki uşaq da daxil olmaqla ən azı səkkiz nəfər itkin düşmüş hesab olunur.
Mediada yayılan məlumata görə, yük maşınları sulfat turşusu daşıyıb.
Təhlükəli kimyəvi maddələrin sızması barədə məlumat alındıqdan sonra dalğıclar çaydan çıxıblar. Hazırda axtarış işləri yalnız qayıqlarla aparılır.
