“Arsenal”ın keçmiş yarımmüdafiəçisi Pol Merson “Liverpul”un müdafiəçisi Trent Aleksander-Arnoldun “Real”a mümkün keçidini şərh edib.
Arena.az Mersonun müvafiq qənaətini təqdim edir:
“O, gələn mövsüm “Real”da olacaq. Mən “Real”dan başqa heç nə görmürəm. Müqavilə müddətinin bitməsinə 6 ay qaldıqda, daha yüksək maaşla yeni müqavilə imzalamamaqla itirilmiş pulun məbləği yalnız artır”, deyə Pol Merson qənaətini əsaslandırıb.
Yeri gəlmişkən qeyd edək ki, “Real” rəhbərliyi ingiltərəli sağ cinah müdafiəçisini məhz cari qış transfer pəncərəsində “qaymaqlılar”ın düşərgəsinə qatmaq istəyir. İddiaya görə, futbolçunun təcili keçidi müqabilində “Liverpul”a 25 milyon avro məbləğində ödəniş təklif edir.
Vurğulanır ki, “Real” Aleksander-Arnoldun “qırmızılar”la müqaviləsinin başa çatacağı yay mövsümünü gözləmək niyyətində deyil. Buna, “Real”ın italyan baş məşqçisi Karlo Ançelottinin israrlı olduğu da xüsusilə vurğulanır.
Xatırladaq ki, Trent Aleksander-Arnoldun bu mövsümün sonunda “Liverpul”dan ayrılacağı və karyerasını İspaniya nəhəngi “Real”da davam etdirəcəyi barədə xəbərlər yayılmaqdadır.
Trent Aleksander-Arnold “Liverpul”un yetirməsidir və 2016-cı ilin iyulundan “qırmızılar”ın əsas komandasında çıxış edir. İngilis futbolçunun Mersisayd klubu ilə cari müqaviləsi 2025-ci ilin iyun ayının sonuna qədər nəzərdə tutulub.
Cari mövsümdə Aleksander-Arnold “qırmızılar”ın heyətində bütün yarışlarda 23 oyuna çıxıb, 1 qol vurub, 5 məhsuldar ötürmə verib.
Aleksander-Arnoldun “Liverpul”un heyətində çıxışının ümumi mənzərəsi 333 oyun, 20 qol və 85 məhsuldar ötürmədən ibarətdir.
Aleksander-Arnold “Liverpul”la İngiltərə Premyer Liqasını (2019/2020), İngiltərə Kubokunu (2022), İngiltərə Liqa Kubokunu (2022, 2024), İngiltərə Super Kubokunu (2023), Çempionlar Liqasını (2018/2019), UEFA Kubokunu (2019/2020), FIFA Klub Dünya Kubokunu (2020) qazanıb.
Trent 2018-ci ilin iyununda debüt etdiyi İngiltərə yığmasının heyətində 33 oyuna çıxıb, 4 qol vurub, 6 məhsuldar ötürmə verib.
“Transfermarkt” internet-portalı 26 yaşlı nüdafiəçinin transfer dəyərini 75 milyon avro məbləğində qiymətləndirir.
