Ukraynaya qarşı müharibəyə komandanlıq edən rus generallarından Rusiya diktatoru Vladimir Putinin baş hərfləri ilə xaç taxmaq tələb olunacaq.
Bu barədə Rusiyanın “İnterfaks” agentliyi məlumat yayıb.
Kremlin sözçüsü Dmitri Peskovun nəşrə verdiyi məlumata görə, Putin Patriarx Kirilldən Rusiya hərbçilərinə təhvil veriləcək xaç və ikonaları təqdis etməyi xahiş edib. Onları Ukrayna ərazisində “xüsusilə vacib tapşırıqları yerinə yetirən” qoşun qruplarının komandirləri qəbul edəcəklər. “Düşünürəm ki, yoldaşlarımız Milad gecəsi bayram ibadəti zamanı Moskva və Bütün Rusiyanın Patriarxı tərəfindən təqdis olunan bu iman simvollarını almaqdan şərəf duyacaqlar”, – Peskov Putindən sitat gətirib.
Patriarx Kirilin Putinin yanında xaç və ikonaları təqdis etdiyi iddia edilir. Peskov həmçinin əlavə edib ki, Putinin xahişi ilə “Xaç zəncirlərinin ayrı-ayrı halqalarına onun ad-familiyasının baş hərfləri həkk olunub”.
//Samir Qurbanov, Editor.az
