“Tesla” Çində enerji saxlama batareyaları istehsal etmək planları üçün Şanxayda yeni fabrik tikmək istəyir. Çin dövlət mediasının məlumatına görə, torpaq alqı-satqısı cümə günü keçirilən imza mərasimi ilə başa çatıb. Rəsmi “Sinxua” xəbər agentliyi fabrikin tikintisinə gələn ilin əvvəlində başlanacağını və istehsalın ilin sonunadək başa çatacağını bildirib.
MediaPost xəbər verir ki, “Tesla”nın yeni fabriki elektrik xidmətləri və digər şirkətlər üçün enerji saxlayacaq batareyalar istehsal edəcək. Bu batareyalar, xüsusilə günəş enerjisi və külək enerjisi kimi bərpa olunan mənbələrdən elektrik enerjisi istehsalına artan tələbatla enerjini saxlayaraq daha səmərəli istifadəni təmin edəcək. “Sinxua” agentliyinin verdiyi məlumata görə, zavod ilkin olaraq ildə 10.000 “Tesla Megapack” istehsal edəcək.
Bu layihə Çin iqtisadiyyatı üçün olduqca müsbət ola bilər. Ticarət Nazirliyi bu ilin ilk 11 ayında xarici investisiyalarda 10% azalma olduğunu açıqlayıb. Çində yoxlamaların artması və ABŞ-ın texnologiya ticarətinə tətbiq etdiyi məhdudiyyətlər xarici şirkətlər arasında narahatlıq yaradır. “Tesla”nın Çindəki strateji əhəmiyyəti CEO Elon Musk-ın dövlət rəsmiləri ilə yaxın münasibətlərinə əsaslanır. Xatırladaq ki, şirkət 2019-cu ildə Şanxayda elektrikli avtomobillərin yığılması üçün zavod yaradaraq Çindəki istehsal mərkəzini genişləndirib. “Tesla” sürətlə inkişaf edib və Çində elektrikli avtomobil bazarında ikinci yeri tutub.
Qeyd edək ki, Çin külək və günəş enerjisi qurğularında dünya lideridir və ölkəni enerji saxlama sənayesi üçün əsas bazara çevirir. “Tesla”nın enerjinin saxlanması sahəsində yeni addımı Çinin bu sahədə liderliyini və bərpa olunan enerjiyə yönəlmiş inkişafını daha da gücləndirə bilər.
Leyla Rüstəmova
