İstanbulda və eyni zamanda Türkiyənin bir neçə şəhərində “Zaza Doğan” mafiya şəbəkəsi çökdürülüb.

Reyting.az xəbər verir ki, bunu Türkiyənin daxili işlər naziri Əli Yerlikaya bəyan edib.

Nazir bildirib ki, İstanbulun 4 vilayətində eyni vaxtda həyata keçirilən “Qəfəs əməliyyatı” çərçivəsində “Zaza Doğan” mütəşəkkil cinayət təşkilatı məhv edilib.

Əməliyyatlar nəticəsində 47 şübhəli şəxs tutulub. Hazırda əməliyyatlar davam edir.

Məlumata görə, Təhlükəsizlik, Qaçaqmalçılıq və Mütəşəkkil Cinayətkarlıqla Mübarizə Baş İdarəsinin (KOM) koordinasiyasında İstanbul Polis İdarəsinin Mütəşəkkil Cinayətkarlıqla Mübarizə Şöbəsi tərəfindən Muğla, Bursa və Mersində eyni vaxtda “Qəfəs əməliyyat”ı təşkil edilib. Əməliyyat zamanı Doğan Aykutun rəhbərlik etdiyi “Zaza Doğan” mütəşəkkil cinayətkar təşkilatı darmadağın olub.

Əməliyyat zamanı 8 silah və 1 kiloqram narkotik vasitənin də ələ keçirildiyi bildirilir.

Sosial media hesabından açıqlama verən daxili işlər naziri Ali Yerlikaya deyib ki, “Zaza Doğan” mütəşəkkil cinayət təşkilatı İstanbul vilayətində 2 ayrı qətl törədib, eyni zamanda 3 nəfəri yaralayıb.

Nazir qeyd edib ki, cinayətkar qrup eyni zamanda borc məsələlərinə gərə “məhkəmələr” qurub və maddi mənfəət qazanıb:

“Hədə-qorxu gəlmək məqsədi ilə 6 fərqli iş yeri və yaşayış yerini basıblar. Həmçinin narkotik ticarəti ilə məğul olub, mafiyanın gücünü göstərmək üçün silahla dolaşaraq sosial mediada paylaşımlar ediblər, 2 nəfəri qaçıraraq işgəncə veriblər”.

A. Yerlikaya cinayətkarlara bir daha xəbərdarlıq edib:

“Cinayətdə təkəbbürlü olanlara, xalqımızın dincliyini pozanlara, mütəşəkkil cinayət təşkilatlarına və dəstələrinə dözməyəcəyik. İstənilən ölçüdə və gücdə olan mütəşəkkil cinayət təşkilatlarını məhv edəcəyik”.



Y. QACAR