“Real”ın braziliyalı hücumçusu Vinisius Junior İspaniyanı 2030-cu il dünya çempionatına ev sahibliyindən məhrum etməyi təklif edib.
Arena.az məlumat verir ki, braziliyalı futbolçu bu təklifini İspaniyada irqçiliklə bağlı vəziyyət dəyişməsə, həyata keçirməyi təklif edib:
“2030-cu ilə qədər bizim inkişaf üçün çox böyük imkanlarımız var. Ona görə də ümidvaram ki, İspaniya inkişaf edib insanı dərisinin rənginə görə təhqir etməyin nə qədər ciddi olduğunu başa düşə bilər. Əgər 2030-cu ildə vəziyyət dəyişməsə, düşünürəm ki, məkanı dəyişmək gərək olacaq. Çünki futbolçular dünya çempionatında oynamaq üçün özlərini rahat və təhlükəsiz hiss etməyəcəklər”, deyə “Vini” vurğulayıb.
Xatırladaq ki, 2030-cu ildə dünya çempionatı İspaniya, Portuqaliya və Mərakeşdə keçiriləcək. Həmçinin, Uruqvay, Argentina və Paraqvayın hər birində yarışın bir açılış oyunun keçirilməsi planlaşdırılır.
Vinisius Junior “Flamenqo”nun yetirməsidir. Braziliyalı vinger “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vinni” madridlilərin heyətində 5 oyuna çıxıb, 1 qol və 3 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 269 oyun, 84 qol, 78 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/205), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 33 oyun keçirib, 5 qol vurub və 5 məhsuldar ötürmə verib. “Vinni” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 180 milyon avro məbləğində qiymətləndirir. Bu isə Vinisiusun dünyanın ən bahalı dörd futbolçusundan biri olması deməkdir.
