Moldova iqtidarı Ukrayna ərazisindən tranzitin qeyri-sabitliyi səbəbindən “Qazprom”a alternativ qaz nəqli marşrutundan istifadənin mümkünlüyü barədə sorğu göndərib.
“Report” xəbər verir ki, bunu TV-8 telekanalının efirində ölkənin energetika naziri Viktor Parlikov söyləyib.
“Ukraynanın nəzarətində olan “Suca” qaz-kompressor stansiyasında vəziyyət narahatlıq doğurur, hətta cari müqavilələrin müddəti bitsə və ya stansiyada qəzalar baş versə belə, qaz təchizatının dayandırılması üçün heç bir ilkin şərt yoxdur, lakin biz yanacaq üçün alternativ yollar üzərində işləyirik. İndi cavab və təfərrüatlar gözlənilir, ancaq əsas hesablama ənənəvi tədarükün davam etdirilməsi üçün aparılır”, – nazir bildirib.
Onun sözlərinə görə, iqtidar və “Moldovaqaz” şirkəti artıq “Qazprom”a Moldovaya qaz nəqli üçün alternativ marşrutların, o cümlədən Türkiyə ərazisindən tranzit yollarının nəzərdən keçirilməsi ilə bağlı sorğular göndərib. Parlikov qeyd edib ki, Rusiya qazının Türkiyə ərazisindən nəqli marşrutu uzadacaq və çatdırılma qiymətini artıracaq ki, bu da əhali üçün son tarifə təsir edəcək.
