Bu gün Abşeron Rayon İcra Hakimiyyətinin başçısı Abdin Fərzəliyevin rəhbərliyi ilə Azərbaycan nümayəndə heyəti Rusiyanın Həştərxan vilayəti qubernatorunun vəzifə səlahiyyətlərinə başlaması münasibətilə bağlı keçirilmiş təntənəli mərasimdə iştirak edib.
“Qafqazinfo” xəbər verir ki, öncə Həştərxan vilayətinin vitse-qubernatoru-Hökümət sədri Denis Afanasyev, Azərbaycan nümayəndə heyətinin tərkibində Abşeron Rayon İcra Hakimiyyətinin başçısı Abdin Fərzəliyev, YAP Abşeron rayon Təşkilatının sədri Abbas Əliyev, “Azərbaycan İş Mərkəzi”nin koordinatoru Nəsimi Məmmədov və yerli diasporanın üzvləri Azərbaycan xalqının Ümummilli Lideri Heydər Əliyevin Həştərxan şəhərində ucaldılmış abidəsini ziyarət edib.
Daha sonra nümayəndə heyəti Həştərxan vilayətinin qubernatoru İqor Babuşkinin Həştərxan Opera və Balet Teatrında baş tutan andiçmə mərasimində iştirak edib.
Mərasimdə Abşeron Rayon İcra Hakimiyyətinin başçısı Abdin Fərzəliyev çıxış edərək Azərbaycan adından təbriklərini çatdırıb və növbəti 5 il ərzində Azərbaycan-Həştərxan arasında müxtəlif sahələr üzrə mövcud strateji əlaqələrin daha da inkişaf edəcəyinə əmin olduğunu bildirib.
