Polşada təbii fəlakət vəziyyəti elan edildi

Polşanın cənubunda baş verən irimiqyaslı daşqınlar səbəbindən ölkədə təbii fəlakət vəziyyəti elan edilib.

Teleqraf.comxarici mətbuata istinadən xəbər verir ki, bu barədə ölkənin baş naziriDonald Tusk "X" sosial şəbəkəsində paylaşım edib.

O qeyd edib ki, səlahiyyətli nazirlər və qurumlarla məsləhətləşmələrdən sonra Nazirlər Şurasının təbii fəlakət vəziyyətinin tətbiqi ilə bağlı fərmanının hazırlanmasını əmr edib.

Qeyd edək ki, Mərkəzi Avropa ölkələrində bir neçə gündən bəri davam edən aramsız yağışlar çaylar və su hövzələrində suyun səviyyəsinin artmasına, daşqınların baş verməsinə səbəb olub.

Təbii fəlakətlə əlaqədar polis və ordu birləşmələri də əraziyə cəlb edilib. Polşanın Klodzko regionunda 1600 nəfər təxliyə edilərək təhlükəsiz əraziyə yerləşdirilib.

Hazırda Polşa ilə yanaşı, Çexiya və Rumıniyada da minlərlə insan daşqınlara görə təxliyə olunub, minlərlə evin elektrik enerjisi kəsilib.

Polşa hökuməti daşqın və kəskin hava şəraiti ilə əlaqədar bir nəfərin həlak olduğunu təsdiqləyib.