"Tekstil klasteri Azərbaycanın "Azərşəkər" və Özbəkistanın "Global Textil" şirkətləri tərəfindən yaradılacaq. Layihə bir çox regionları əhatə edir və 2400 yeni iş yerinin açılması nəzərdə tutulmuşdur. Əkinçilik istiqaməti bu sahədə ixtisaslaşmış Yevlax, Ağcabədi, İmişli, Füzuli və digər rayonlardakı fermerlərlə işlər nəzərdə tutulub. Əkinçilikdən sonrakı mərhələdə pambığın ilkin emalı üzrə zavodların Ucar və Ağcabədidə olması nəzərdə tutulur".
Bunu "Azərşəkər" şirkətinin İdarə heyətinin sədri Nəsib İslamzadə bildirib.
O qeyd edib ki, son 1 il ərzində layihənin iqtisadi səmərəliyi dəyərləndirilib, pambıq emalı və keyfiyyəti üzrə, həmçinin də pambıq yetişdirilməsi sahəsində testlər uğurla həyata keçirilib. Yaxın 3 ayda iplik istehsalının başlanması üçün tikinti işlərinə başlamaq nəzərdə tutulub.
Nəsib İslamzadə bildirib ki, Özbəkistan ilə ortaq Tekstil klasteri layihəsinin ümumi dəyəri 104 milyon dollar investisiya təşkil edir. Bu investisiyanın böyük bir hissəsi iplik emalı və parça istehsalı zavodunun üzərinə düşür. İplik zavodu və parça istehsalı üzrə birlikdə investisiyanın dəyəri təqribən 80 milyon dollar təşkil edir.
Layihə çərçivəsində 40 min ton pambıq emalının sona qədər təşkili nəzərdə tutulub. Pambıq tədarükünün yarısını "Azərşəkər" şirkətinin daxili resursları ilə, qalan hissənin isə ölkədə mövcud olan digər təşkilatlar və fermerlər təsərrüfatları üzərindən təmini nəzərdə tutulmuşdur.
"Bunun qarşılığında 11 min ton iplik istehsalı planlaşdırılır və ən sonda isə geyim istehsalına qədər bu proses davam edəcəkdir. Dəyər zəncirinin son geyimə kimi davam etməsi planlaşdırılır ki, bu da ölkəmizin mahlıc ixracından daha dəyərli tekstil ixracatçısına çevrilməsini və sektorun daha stabil şərtlərlə inkişafına təkan verəcəkdir. Layihə çərçivəsində Avropada bir çox böyük markalar ilə əməkdaşlıq və yaxın regiona ixracların həyata keçiriləcəyi planlaşdırlır.
Şirkətimizin əkinçilik istiqamətində investisiyaları davam etməkdədir, cari ayın sonuna Füzulidə 1500 ha müasir suvarma sistemləri ilə təchiz edilmiş təsərrüfat fəaliyyətə başlayacaqdır, 2025-ci il ərzində isə əlavə 5400 ha ərazinin əkin dövriyyəsinə cəlb edilməsi planlaşdırılır",- "Azərşəkər" şirkətinin İdarə heyətinin sədri deyib.
