Müstəqil Dövlətlər Birliyi (MDB) ölkələri arasında səmərəli ticarət-iqtisadi əməkdaşlıq nəqliyyat dəhlizlərinin inkişafı ilə sıx bağlıdır.
Day.Az Trend-ə istinadən bildirir ki, bunu Qazaxıstan prezidenti Kasım-Jomart Tokayev Moskvada MDB-nin Dövlət Başçıları Şurasının məhdud tərkibdə keçirilən iclasında deyib.
Onun sözlərinə görə, Qazaxıstan artıq əsas beynəlxalq marşrutlar üzrə dəmiryolu infrastrukturunun genişmiqyaslı genişləndirilməsinə başlayıb.
"Keçən il mən MDB-yə üzv dövlətlərin ərazilərindən keçən əsas nəqliyyat arteriyalarının birləşdirilməsi Konsepsiyasının hazırlanmasını təklif etmişdim. Düşünürəm ki, bu işi ən qısa zamanda başa çatdırmaq olar.
Ümumiyyətlə, "Bir kəmər, bir yol", "Şimal-Cənub", Trans-Xəzər marşrutu və s. kimi qlobal layihələrin yüksək keyfiyyətlə sinxronlaşdırılması Avrasiya qitəsində iqtisadi, institusional və nəqliyyatın vahid inkişaf konsepsiyasını yaratmağa imkan verəcək", - deyə Tokayev əlavə edib.
