Bu ilin ilk 9 ayı ərzində Azərbaycanda 21,6 milyon ton neft (qaz kondensatı ilə birlikdə) hasil edilib.
Yeniavaz.com açıqlanan rəsmi məlumatlara istinadən xəbər verir ki, ötən ilin eyni dövrü ilə müqayisədə neft hasilatı 1,1 milyon ton və ya 4,8% azalıb.
Neft hasilatının 12,5 milyon tonu “Azəri-Çıraq-Günəşli”nin, 3,1 milyon tonu (qaz kondensatı) “Şahdəniz”in, 0,4 milyon tonu (qaz kondensatı) “Abşeron” yatağının payına düşüb. SOCAR üzrə neft (qaz kondensatı ilə birlikdə) hasilatı 5,6 milyon ton təşkil edib.
Müqayisə üçün bildirək ki, ötən ilin eyni dövründə neft hasilatının 13,5 milyon tonu “Azəri-Çıraq-Günəşli”nin, 3,3 milyon tonu (kondensat) “Şahdəniz”in, 140 min tonu (kondensat) “Abşeron” yatağının payına düşüb. SOCAR üzrə neft (kondensatla birlikdə) hasilatı 5,8 milyon ton təşkil edib.
Qeyd edək ki, bu ilin ilk 9 ayın da 17,9 milyon ton neft (qaz kondensatı ilə birlikdə) ixraca nəql olunub. Bunun 15,6 milyon tonu konsorsiumun, 2,3 milyon tonu isə SOCAR-ın payına düşüb.
Hesabat dövründə ölkədə neft emalı 5 milyon ton təşkil edib.
Onu da bildirək ki, ötən ilin ilk 9 ayında 19 milyon ton neft (kondensatla birlikdə) ixraca nəql olunub. Bunun 16,7 milyon tonu konsorsiumun, 2,3 milyon tonu isə SOCAR-ın payına düşür. Neftin emalı 4,9 milyon ton təşkil edib.
2024-cü ilin sentyabr ayında gündəlik neft (qaz kondensatı ilə birlikdə) hasilatı 78,7 min ton olub. Bunun 65 min tonunu xam neft, 13,7 min tonunu qaz kondensatı təşkil edib.
Məlumat üçün onu da bildirək ki, bu ilin yanvar- sentyabr aylarında ölkədə 37,1 milyard kubmetr təbii qaz hasil edilib. Qazın 9,8 milyard kubmetri “Azəri-Çıraq-Günəşli”, 20,5 milyard kubmetri “Şahdəniz”, 1,1 milyard kubmetri “Abşeron”, 5,7 milyard kubmetri SOCAR üzrə hasil olunub. Ötən ilin müvafiq dövrünə nisbətən 1,1 milyard kubmetr artımla qaz hasil edilib.
Bu dövrdə xaricə qaz satışı 18,4 milyard kubmetr təşkil edib ki, bu da ötən ilin müvafiq dövrü ilə müqayisədə 4,2 faiz çoxdur. Avropaya 9,4 milyard kubmetr, Türkiyəyə 7,3 milyard kubmetr, Gürcüstana isə 1,7 milyard kubmetr qaz satılıb. Türkiyəyə TANAP-la bu müddətdə 4,2 milyard kubmetr qaz nəql olunub.
“Azəri-Çıraq-Günəşli” və “Şahdəniz” yataqları istismara veriləndən 1 oktyabr 2024-cü il tarixinədək 644,8 milyon ton neft (qaz kondensatı ilə birlikdə), 455,6 milyard kubmetr qaz hasil edilib. “Azəri-Çıraq-Günəşli”dən 597,2 milyon ton neft, 226,1 milyard kubmetr qaz, “Şahdəniz”dən isə 47,6 milyon tona yaxın kondensat, 229,5 milyard kubmetr qaz çıxarılıb.
Bu yataqlardan 1 oktyabr 2024-cü il tarixinədək 642,9 milyon ton neft (kondensatla birlikdə) və 163,9 milyard kubmetr qaz ixraca nəql edilib.

Elnur Əli