"Merck" şirkəti xərçəngə çarə axtaran şirkəti "Merck" şirkəti "Modifi Biosciences"-i 1,3 milyard dollara satın alaraq, xərçəng terapiyaları üzərində tədqiqat aparan bu biotexnoloji şirkətin məhsullarına çıxış əldə edib.
E-saglam.az Valyuta.Az-a istinadən xəbər verir ki, sazişə əsasən, ABŞ dərman istehsalçısı "Merck" ilkin olaraq "Modifi"-yə 30 milyon dollar ödəyib. Bundan əlavə, "Modifi", beyin şişləri, xüsusilə də glioblastomalar kimi müalicəsi çətin olan xəstəliklərə qarşı hazırlanmaqda olan KL-50 adlı yeni terapiya sinfi üçün mərhələli olaraq 1,3 milyard dollara qədər əlavə ödənişlər almaq hüququna malikdir.
"Modifi Biosciences", Konnektikut ştatının New Haven şəhərində yerləşən, xərçəng hüceyrələrini öldürmək üçün onların DNT-sini dəyişdirərək, yeni terapiyalar hazırlayan bir şirkətdir. Şirkət hələ klinik sınaq mərhələsinə çatmayıb və bu günə qədər 10,7 milyon dollar maliyyə toplayıb. İnvestorlar arasında Amerika Xərçəng Cəmiyyətinin investisiya qolu "BrightEdge" də var.
"Merck" şirkəti, 2030-cu illərin sonuna qədər patent qorunmasını itirəcək məşhur xərçəng immunoterapiyası "Keytruda"-nın gəlir itkisini kompensasiya etmək üçün yeni namizədlər axtarır. Ötən il Merck, Yaponiyanın "Daiichi Sankyo" şirkəti ilə 5,5 milyard dollarlıq saziş bağlayaraq, hədəfli xərçəng terapiyaları olan antikor dərman birləşmələrini birgə inkişaf etdirməyə başlamışdı. Bu dərmanlar yalnız şiş hüceyrələrini hədəf alır və sağlam hüceyrələrə zərər vermir.
"Merck & Co.", dünyanın ən böyük və nüfuzlu əczaçılıq şirkətlərindən biridir. 1891-ci ildə ABŞ-da qurulan "Merck", dərmanların, peyvəndlərin və bioloji məhsulların hazırlanması, istehsalı və satışı ilə məşğuldur. Şirkət, xüsusilə "Keytruda" kimi məşhur xərçəng immunoterapiyaları, həmçinin müxtəlif digər dərmanlar və vaksinlər ilə tanınır. "Merck" həmçinin tibb elminə və innovasiyalara töhfə verən geniş tədqiqat fəaliyyətləri ilə də fərqlənir. Şirkətin əsas məqsədi, dünyada insanların həyat keyfiyyətini yüksəltmək və sağlamlıq problemlərinə müasir həllər təqdim etməkdir.
E-saglam.az
