Çin Prezidenti Si Cinpin ABŞ-də baş tutan prezident seçkilərindən sonra Donald Trampla telefon danışığı aparıb.
Yeniavaz.com xəbər verir ki, bu barədə mənbələrə istinadla CNN telekanalı məlumat yayıb.
İddialara görə, Si Cinpin Trampı seçkilərdəki qələbəsi münasibətilə təbrik edib. Çinin Vaşinqtondakı səfirliyi bu barədə şərh verməkdən imtina edib.
Digər tərəfdən, Si Cinpin ABŞ prezident seçkilərində qələbə qazanması münasibətilə Donald Trampa təbrik teleqramı göndərib.
Bu barədə “Sinxua” agentliyi məlumat yayıb.
Teleqramda Çin Xalq Respublikasının sədri vurğulayıb ki, iki dövlət arasında sabit və davamlı münasibətlər hər iki tərəfin maraqlarına, eləcə də beynəlxalq ictimaiyyətin gözləntilərinə cavab verir.
“Ümid edirik ki, hər iki tərəf qarşılıqlı hörmət, dinc yanaşı yaşama və qarşılıqlı faydalı əməkdaşlıq prinsiplərinə sadiq qalacaq, dialoq və ünsiyyəti gücləndirəcək, fikir ayrılıqlarını düzgün idarə edəcək və qarşılıqlı faydalı əməkdaşlığı genişləndirəcək. Tarix göstərdi ki, Çin və ABŞ əməkdaşlıqdan qazanır, qarşıdurmadan isə uduzur. Ümid edirəm ki, Çin və ABŞ yeni dövrdə hər iki ölkəyə və bütün dünyaya fayda gətirəcək düzgün qarşılıqlı əlaqə yolunu tapacaqlar”, - Çin Prezidenti bildirib.
