Madrid “Atletiko”sunun baş məşqçisi Dieqo Simeone UEFA Çempionlar Liqasında PSJ üzərində səfər qələbəsini şərh edib.
Arena.az xatırladır ki, “döşəkçilər” yarışın Liqa mərhələsinin 4-cü turu çərçivəsində Fransa nəhəngi üzərində 2:1 hesablı əzmkar qələbə qazanıblar.
Matçdan sonra baş tutan mətbuat konfransında Dieqo Simeone jurnalistlərə açıqlamasında bunları söyləyib:
“Bizim beş müdafiəçimiz əskik idi. Buna rəğmən, komanda güclü idi. Meydanın dərinliyindən ötürmədən sonra qol buraxdıq, onda komanda dağıla bilərdi, amma biz buna yol vermədik. Futbolumuzu oynamağa davam etdik. Molinanın qolu fantastik komanda işinin bəhrəsi idi. “Lill” ilə oyunda (1:3) görmüşdük ki, nə qədər fürsətimiz olub, amma qol vura bilməmişdik. Bu gün isə əksinə idi. Bu, komandamızın böyük əməyinin nəticəsi idi. Lino, Korrea və Reynilda ilə komandanı canlandıra bildiyimə görə sevindim. Biz planımızdan kənara çıxmadıq. Biz gərək olan surətdə müdafiə olunduq”, – UEFA-nın rəsmi saytı argentinalı mütəxəssisdən sitat gətirir.
4 turdan sonra “Atletiko” UEFA Çempionlar Liqasının yarış cədvəlində 6 xalla 23-cü pillədə qərarlaşıb. PSJ isə 4 xalla 25-ci pillədədir.
