Madrid “Atletiko”sunnu mərkəz hücumçusu Antuan Qrizmann Fransa yığmasına qayıtmaq fikrində olmadığını vurğulayıb.
Arena.az “Eurosport” televiziya şəbəkəsinin Fransa şöbəsinə istinadən, fransalı futbolçunun bu barədə fikrini təqdim edir:
“Hər şey bitib, mən geri qayıtmağa hazırlaşmıram. Mən taraz qərar vermişəm, bu, şıltaqlıq deyildi”, deyə Qrizmann qətiyyətlə bildirib.
Xatırladaq ki, Qrizmann bu il sentyabr ayının sonunda “xoruzlar”ın heyətində çıxışına xitam verdiyini açıqlamışdı. Daha sonra isə mətbuatda, fransalı futbolçunun geri-dönüş ehtimalı ilə bağlı müxtəlif xəbərlər peyda olmağa başlamışdı.
Vurğulayaq ki, Fransa yığmasında çıxış etməsinə rəğmən, Qrizmann ata tərəfdən almanəsilli, ana tərəfdən isə portuqaləsillidir.
“Real Sosyedad” futbol akademiyasının yetirməsi olan Antuan Qrizmann “Atletiko”ya 2014-cü ilin iyulunda elə, Sosyedad klubundan keçib. Daha sonra isə fransalı futbolçu bir neçə mövsüm “Atletiko” ilə “Barselona” arasında satış və icarə əsasında var-gəl edib. 2023-cü ilin iyulunda isə Antuan 20 milyon avro müqabilində “Barselona”dan tamhüquqlu əsasda “Atletiko”ya transfer edilib. Qrizmanın Madrid klubu ilə müqaviləsi 2026-cı ilin iyun ayının sonuna qədər qüvvədədir.
Cari mövsümdə Qrizmann “döşəkçilər”in heyətində 17 oyuna 4 qol, 6 məhsuldar ötürmə ilə fərqlənib. Qrizmanın “Atletiko”nun heyətində ümumi statistikası isə belədir: 406 oyun, 185 qol, 90 məhsuldar ötürmə.
Vurğulayaq ki, Qrizmann “Atletiko” tarixinin ən sərrast futbolçusudur.
Qrizmann “Atletiko” ilə İspaniya Super Kubokunun (2014/2015), Avropa Liqasının (2017/2018), UEFA Super Kubokunun (2017/2018) qalibi olub.
Qrizmann 2014-cü ilin martında debüt etdiyi Fransa yığmasının heyətində 137 oyun keçirib, 44 qol vurub, 38 məhsuldar ötürmə verib. Antuan “xoruzlarlar”la 2018-ci ildə Rusiyada keçirilmiş dünya çempionatının və 2021 UEFA Millətlər Liqasının qalibi olub. Qrizmann həmçinin 2016-cı ildə Fransada keçirilmiş Avropa çempionatının finalçısı və 6 qolla ən sərrast futbolçusu olub.
“Transfermarkt” internet-portalı 33 yaşlı fransalı hücumçunun transfer dəyərini 25 milyon avro məbləğində qiymətləndirir.
