Portuqaliya yığmasının hücumçusu Kristiano Ronaldo Səudiyyə Ərəbistanının “Əl-Nəsr” klubunun heyətində növbəti matçına çıxıb.
Arena.az məlumat verir ki, ulduz futbolçu Səudiyyə Ərəbistanı Peşəkar Liqasının 10-cu turu çərçivəsində paytaxt təmsilçisi “Ər-Riyad”la oyunun iştirakçısı olub.
“Əl-Nəsr” səfərdə baş tutan bu oyunda 1:0 hesablı qələbə qazanıb. “Nəcd cəngavərləri”nin kapitanı olan Kristiano bu oyunda məhsuldar fəaliyyəti ilə diqqət çəkməyib. “Əl-Nəsr” in qələbə qolunu isə oyunun 41-ci dəqiqədində seneqallı hücumçu Sadio Mane vurub. Mane ərəb hücumçu Əbdülrəhman Qəribin ötürəsini tamamlayıb.
10 turdan sonra 22 xal toplamış “Əl-Nəsr” yarış cədvəlində 3-cü pillədə qərarlaşıb. “Ər-Riyad” isə 14 xalla 7-cı sıradadır. Səudiyyə Ərəbistanı Peşəkar Liqasına 28 xalla “Əl-Hilal” başçılıq edir.
Oyundan sonra Ronaldo adəti üzrə duyğularını paylaşıb: “Qələbə – bizim yüksəlişimiz üçün yanacaq mənbəyidir”, – “Kriş” özünün rəsmi “X” sosial şəbəkə hesabı üzərindən dərc edib.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 15 oyuna 10 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 79 oyun, 68 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 216 oyuna 133 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
