2027-ci ilə qədər Azərbaycanda səkkiz böyük günəş və külək enerjisi stansiyaları qurulması üçün 2.8 milyard dollarlıq investisiya planlaşdırılır. Bu stansiyaların ümumi gücü isə təxminən iki gigavat olacaq.
APA xəbər verir ki, bunu COP29 çərçivəsində Mərkəzi Asiya üçün Enerji Keçid İnvestisiya Forumunda çıxışı zamanı Azərbaycan Bərpa Olunan Enerji Agentliyinin departament rəhbəri Fəqan Abdürrəhmanov deyib.
O qeyd edib ki, bu iki gigavat sadəcə bir rəqəm deyil, ABŞ-da yerləşən TetraTech şirkəti və Türkiyədə yerləşən EPRA konsaltinq şirkəti tərəfindən aparılan qiymətləndirmələr əsasında hesablanmış bir rəqəmdir.
“Hazırda, 4,500 hektar ərazi artıq bərpa olunan enerji zonası kimi təyin edilib. Bu torpaq müasir megalayihəyə daxil edilib və bu gün səhər tərəfdaşlarımızla maliyyə şərtləri yekunlaşdı. Bu xüsusi zonalar, böyük enerji layihələrinin həyata keçirilməsində mühüm rol oynayacaq və Azərbaycanın vadidə davamlı gələcək qurmaq qətiyyətini gücləndirəcək” - AREA-nın departament rəhbəri əlavə edib.
