Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) Parlamentlərarası İttifaq və Milli Məclisin birgə təşkilatçılığı ilə Parlament Görüşünün ikinci günündə iqlim fəaliyyətinə hərtərəfli və ədalətli yanaşmanın təşviqi müzakirə edilib...
"Report" xəbər verir ki, sessiyada çıxış edən Beynəlxalq İnkişaf Hüquq Təşkilatının (IDLO) Baş Direktoru Jan Biql deyib ki, iqlim dəyişikliyindən hər bir ölkə eyni formada təsirlənmir:
"Bizim məqsədimiz iddialı iqlim tədbirləri görməklə insanları səlahiyyətləndirmək, ədalət və inklüziv qərar verməni təşviq etməkdir. Parlamentarilərin də rolu burada vacibdir".
Onun sözlərinə görə, iqlim dəyişikliyindən qadınlar da çox təsirlənir:
"Biz qadın fermerləri dəstəkləməklə kənd təsərrüfatı məhsullarını artıraraq icma dayanıqlılığını artıra bilərik. Qadınların da burada rolu artırılmalıdır. Parlamentarilər ilk növbədə iqlim qanunvericiliyini dəstəkləmək üçün çalışmalıdırlar".
İnteqrasiya edilmiş Dağların İnkişafı üzrə Beynəlxalq Mərkəzin (ICIMOD) Regional Fəaliyyət və Qlobal Təbliğat üzrə Strateji Qrupun rəhbəri David Potter iqlim dəyişikliyinin təsirlərindən bəhs edərək vurğulayıb ki, daşqınların sayının artması, quraqlıqların olması insanların yaşadıqları əraziləri tərk etməyə məcbur edib.
Benin Milli Assambleyasının üzvü Jeremie Adomahou çıxışı zamanı iqlim dəyişikliyinin həlli üçün siyasi iradənin önəminə toxunub:
"Biz, həmçinin layihə və planlar yaratmalıyıq. Eyni zamanda qarşıya qoyduğumuz məqsədləri publik siyasətə çevirməliyik. Bizim büdcəmiz iqlimə həssas olmalıdır".
BMT-nin İnkişaf Proqramının iqlim dəyişmələri üzrə eksperti Ketrin Vonq söyləyib ki, əvvəlki illərlə müqayisədə temperatur və müharibələr artıb:
"Münaqişələrdən əziyyət çəkən ölkələr iqlim dəyişikliyindən də əziyyət çəkirlər. Bu da onu göstərir ki, iqlimə təsirlər gündən-günə artır. Münaqişələrdən əziyyət çəkən ölkələrdə çox böyük risklər mövcuddur. Bu da beynəxlalq və milli səviyyədə adaptasiya planlarının tətbiqini çətinləşdirir. Əsrin ortasında 200 milyondan çox insan iqlim dəyişikliyi səbəbindən məcburi köçkün olacaq. Bu say daha da çox ola bilər".
Sonda sessiyada iştirak edən qonaqlar mövzu ətrafında müzakirələr aparıb.
***
Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) Parlamentlərarası İttifaq və Milli Məclisin birgə təşkilatçılığı ilə Parlament Görüşünün ikinci günü başlayıb.
"Report" xəbər verir ki, tədbir çərçivəsində "İqlim həssaslığını həll edilməsi: İqlim fəaliyyətinə hərtərəfli və ədalətli yanaşmanın təşviqi" adlı sessiyası baş tutur.
Bu sessiyada iqlim dəyişikliyinin real həyatdakı təsirləri haqqında əldə edilən məlumatlara əsaslanaraq, bu sessiya parlamentarilərə kiçik ada dövlətləri , dağlıq və dənizə çıxışı olmayan ölkələr kimi müxtəlif ölkələrin özünəməxsus həssaslıqlarının necə həll edilməsi barədə daha dərindən araşdırma aparmaq imkanı verəcək.
Bu kontekstlərdə dayanıqlı inkişaf üçün vacib olan təbiət və biomüxtəliflik kimi mühitlərin bəzi mühüm xüsusiyyətlərini və onların iqlim dəyişikliyinin həlli üçün necə qorunub istifadə edilə biləcəyi müzakirə ediləcək.
Sessiya həmçinin iqlim dəyişikliyi ilə bağlı nəsillərarası dialoqu təşviq edəcək.
Qeyd edək ki, 66 ölkədən və beynəlxalq təşkilatlardan 92 nümayəndə heyətinin, 330-dək iştirakçının qatıldığı tədbirdə 12 spiker və vitse-spiker olmaqla, 160-dan çox parlament üzvü iştirak edir.
Fotolar
Poliqon.info
