”Unibank”ın 1 milyona yaxın müştərisi var. Əksəriyyət kredit götürmüş və həyatını bir növ kreditə xərcləyən insanlardır. Sizin ödədiyiniz kreditlərlə “Unibank”ın rəhbəri Fransada dəbdəbəli mülk alır, oğlu isə Karib adalarında və Monakodakı (Monte Karlo) kazinolarda dolaşır”. Tribunainfo.az xəbər verir ki, bu barədə tanınmış araşdırmaçı journalist Cavanşir Həsənli yazıb.
O bildirib ki, Eldar Qəribov “Unibank”ın əsas səhmdarı, Müşahidə Şurasının sədridir. “Onun Malta vətəndaşlığı var, Fransa prezidentinin fərmanı ilə bu ölkənin ali mükafatı – “Fransanın Fəxri Legion Kavaleri ordeni” ilə təltif olunub”.
Həsənli qeyd edir ki, Azərbaycanla Fransa arasındakı gərgin münasibətlər bankirin bu ölkədəki lüksünə təsir göstərməyib. “Onun dəyəri bir neçə milyon avro olan “Floriana” adlı sevimli villası və əmlak şirkəti “siyasətə qarışmır”.
Araşdırmaçı yazır ki, Eldar Qəribov ötən il bankda səhmlərini 7.31 faiz artıraraq 91 faizə yüksəldib. “Bu işdə ona yaxın dostu, Fransanın Nisada şəhərində qapı qonşusu olan işadamı Bəylər Məmmədov kömək edir. Bəylər Məmmədov və kürəkəni Kamal Hacıyev (deputat Sabir Hacıyevin oğlu) Maltada təsis etdiyi LENSTOR ENTERPRISES LTD şirkəti üzərindən Lüksemburqda sahib olduğu “Canley Finance SA” maliyyə şirkəti vasitəsilə bankın səhmlərinin 7.31 faizini digər səhmdardan alıb, sonra Lüksemburq şirkəti adından əsas səhmdara satır. Yəni sol əli boynunun arxasından aparıb sağ qulağını qaşıyıb. İctimaiyyətə elə təqdim olundu ki, guya Eldar Qəribov səhmləri xarici şirkətdən alıb. Ola bilsin ki, Eldar Qəribov bununla təkcə ictimaiyyəti deyil, bankın digər səhmdarı olan Avropa Yenidənqurma və İnkişaf Bankını və Almaniyadakı tərəfdaşını da aldadıb”.
Cavanşir Həsənli iddia edir ki, Eldar Qəribovun oğlu İlkin Qəribli 2015-ci ildən birinci oyundan “əli yaxşı gətirmiş” qumarbazdır və dünyanın ən məşhur kazinolarının daimi müştərisidir. “O zaman ailəsi ilə Baham adalarında istirahət edərkən dostları İlkini kazinoya aparıblar. “Poker News”un məlumatına görə, bankirin oğlu o zaman 25 min “stavka” ilə 1.105.040 dollar və bir ədəd lüks “Style” saatı udub. O vaxtdan Eldar Qəribov oğunu qumardan ayıra bilməyib”.
Yazıda adları keçən şəxslərin də mövqeyini dərc etməyə hazırıq.
(siam.az)
