Nizami Zeynalov,
YAP Qazax rayon təşkilatı ərazi partiya təşkilatının sədri
Paytaxt Bakının ən görməli yerində yaradılan Zəfər Parkı 2020-ci ildə Qarabağ müharibəsində qazanılan şanlı qələbənin əzəmətini və xalqın qəhrəmanlıq tarixini əbədiləşdirmək məqsədilə salınıb. Zəfər Parkının təməli 2020-ci ilin sonlarında qoyulmuş və rəsmi açılışı noyabrın 8-də keçirilmişdir. Zəfər parkı Möhtərəm Prezidentimiz cənab İlham Əliyevin 2020-ci il dekabrın 3-də imzaladığı sərəncamla Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm Zəfərin əbədi olaraq yaddaşlarda qalması və ictimaiyyətə nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə salınıb.
Möhtəşəm qələbəmizin 4-cü ilində Bakıda Zəfər parkının açılması, Möhtərəm Prezidentimiz cənab İlham Əliyevin Zəfər parkının açılışında çıxışı ilə çox əlamətdar oldu.
Çıxışı zamanı Ölkə Başçısı bildirdi ki, bu gün Azərbaycan Zəfər bayramını qeyd edir. Bu münasibətlə bütün Azərbaycan xalqını ürəkdən təbrik edirəm, Azərbaycan Silahlı Qüvvələrini təbrik edirəm. Hər birimiz üçün əziz bir gündə Vətən uğrunda öz canlarından keçmiş qəhrəman şəhidlərimizə Allahdan rəhmət diləyirəm. Allah bütün şəhidlərimizə rəhmət eləsin!.
Dövlət Başçısı onu da qeyd etdi ki, biz şəhidlərimizin qisasını, qanını döyüş meydanında aldıq. 44 günlük Vətən müharibəsi bizim şanlı tariximizdir, parlaq Qələbəmizdir. Biz həm Birinci Qarabağ müharibəsinin, həm İkinci Qarabağ müharibəsinin, eləcə də antiterror əməliyyatının şəhidlərinin qanını döyüş meydanında aldıq, öz ərazi bütövlüyümüzü, suverenliyimizi bərpa etdik.
Ölkə Rəhbərinin söylədiyi kimi, qırx dörd gün ərzində Azərbaycan Silahlı Qüvvələri ancaq və ancaq irəli gedirdi. Hər gün, hər saat irəli gedərək döyüş meydanında 300-dən çox şəhər və kəndimizi işğalçılardan azad etdik və düşməni kapitulyasiya aktının imzalanmasına məcbur etdik. Qırx dörd gün ərzində şəhərlərimizin, kəndlərimizin azad edilməsi Ordumuzun gücünü, hərbçilərimizin peşəkarlığını, fədakarlığını, xalqımızın əzmini bütün dünyaya nümayiş etdirmişdir. Torpaqlarımız 30 il ərzində işğal altında olsa da, Azərbaycan xalqı və Azərbaycan rəhbərliyi bu işğalla heç vaxt barışmırdı. Baxmayaraq ki, Ermənistanın arxasında duran bir çox dövlətlər bizim bu işğalla barışmağımız üçün müxtəlif üsullardan istifadə edirdilər. Azərbaycan xalqı yaxşı xatırlayır, böyük dövlətlər, bu məsələni - Ermənistan-Azərbaycan münaqişəsini guya həll etməyə çalışan vasitəçilər dəfələrlə bəyan edirdilər ki, bu münaqişənin hərbi həlli yoxdur. Onu demək istəyirdilər ki, biz bu işğalla barışaq. Onların planlarında məsələni həll etmək yox, işğala son qoymaq yox, Azərbaycan torpaqlarını erməni işğalının altında əbədi saxlamaq idi. Biz bunu görürdük, bilirdik. İllər keçdikcə, hər bir danışıqlar dövrü uğursuzluqla başa çatdıqca həm Azərbaycan rəhbərliyi, həm Azərbaycan xalqı bunu əyani şəkildə görürdü. Biz isə bu vəziyyətlə barışa bilməzdik. Hələ 2003-cü ildə ilk dəfə Azərbaycan Respublikasının Prezidenti vəzifəsinə seçiləndə mən bəyan etmişdim ki, nəyin bahasına olursa-olsun, biz öz ərazi bütövlüyümüzü bərpa edəcəyik, Azərbaycanın ərazi bütövlüyü, suverenliyi danışıqlar mövzusu olmayacaq və həyat bunu göstərdi.
Möhtərəm Prezidentimiz vurğuladı ki, biz düşməni kapitulyasiya aktının imzalanmasına məcbur etdik. Biz hazırlaşırdıq, güclü ordu yaradırdıq, iqtisadi inkişafı təmin edirdik, çünki Ermənistandan fərqli olaraq heç bir kənar yerdən yardım almırdıq, ancaq öz gücümüzə güvənirdik. İqtisadi inkişaf, siyasi çəkimizin böyük olması, sözümüzü beynəlxalq tribunalarda qətiyyətlə deməyimiz, xalq-iqtidar birliyi, gənc nəslin yetişdirilməsi, cəmiyyətdə vətənpərvərlik ruhunun bərqərar olması - bütün bu amillər bizi Qələbəyə doğru aparırdı. Bütün bu amillərin cəmləşməsi bu Qələbəni mümkün etmişdir. Cəmi 44 gün ərzində düşmənin 6-7 müdafiə xəttini öz sinəsini qabağa verərək, güllə altına qoyaraq yaran bizim qəhrəman övladlarımız, hərbçilərimiz bütün dünyaya Azərbaycan xalqının əyilməz ruhunu, gücünü, iradəsini bir daha göstərmişdir. Biz düşməni kapitulyasiya aktının imzalanmasına məcbur etdik. Həmin düşmən 2019-cu ildə Xankəndidə “Qarabağ Ermənistandır və nöqtə” demişdi. Biz onu məcbur etdik ki, bu gün “Qarabağ Azərbaycandır” deyir və bundan sonra da deyəcək, öz xoşu ilə yox.
Bəli, xalqımızın qürur yerinə çevrilən Zəfər Parkı ölkəmizin tarixində qəhrəmanlıq dastanının simvolik ifadəsidir. Park həm də gücün, birliyin və milli ruhun təcəssümüdür. O, təkcə bir tarixi hadisəni deyil, həm də Azərbaycanın gələcəyə olan inamını və torpaqlarını qorumaq əzmini ifadə edir. Ziyarətçilər buraya gələrək, həm keçmişə hörmətlərini ifadə edir, həm də gələcək nəsillərə milli ruhu aşılamaq missiyasına qoşulurlar.Zəfər Parkı təkcə bir istirahət və ziyarət yeri deyil, həm də xalqımızın əzmkarlığının, qürurunun və qələbə ruhunun simvoludur. O, Azərbaycanın tarixi zəfərini yaşatmaqla yanaşı, xalqımızın birlik və əzmini gələcək nəsillərə çatdıran bir körpü rolunu oynayır.Qalib Azərbaycan indi bölgə ölkələrinin inkişafına, təhlükəsizliyinə, sülh və əminamanlıq şəraitində yaşamasına şalışan qüdrətli bir dövlətdir.
